“Charlstonlik mergan” 9 nafar afroamerikalikni o‘ldirganligini tan oldi

AQSh hukumatining ma’lumotiga ko‘ra, Charlstondagi (Janubiy Karolina shtati) metodistlar cherkovining to‘qqiz nafar qora tanli dindorini o‘ldirgan Dilan Ruf so‘rov jarayonida jinoyatni sodir etganligini tan oldi. Bu haqda CNN telekompaniyasi ma’lum qildi, deb yozadi “TASS”.

Ruf Charlstondagi cherkovga borib, bino ichkarisidagi kishilarga qarata o‘q uzganligini tan oldi. Yana bir tushuntirishida esa yuz bergan hodisa haqida boshqa afroamerikaliklarga so‘zlab berishi uchun dindorlardan birini tirik qoldirmoqchi bo‘lganligini ma’lum qildi.

“Kimdir buni amalga oshirishi kerak edi”, — dedi Ruf jinoyati haqida so‘z yurita turib.

U, shuningdek, oq irq ustunligi g‘oyasi tarafdori ekanligini tasdiqladi.

AQSh Federal huquqni muhofaza qilish organlari tomonidan Rufga nisbatan 33 ta band bo‘yicha ayblov ilgari surildi.