BMT Xavfsizlik kengashi va tashkilot bosh kotibi Pan Gi Mun Gambiyaning amaldagi prezidenti Yayya Jammeni saylovlardagi mag‘lubiyatini tan olish va 2017-yil yanvarida lavozimini egallashi lozim bo‘lgan Adam Barrouga hokimiyatni topshirishga chaqirdi. Bu haqda “TASS” xabar bermoqda.
OAV uchun bayonotda kengash a’zolari davlatning amaldagi rahbarini “Gambiya xalqining 2016-yil 1-dekabrdagi azmu qarorini hurmat qilish va biron-bir shartlar hamda noqonuniy cho‘zishlarsiz saylangan prezidentga hokimiyatni topshirish”ga da’vat qildi. Shu bilan birga, barcha tomonlar “imkon qadar o‘zini tiyish, zo‘ravonlikka yo‘l qo‘ymaslik va tinchlikni saqlash”ga chaqirilgan va “Gambiyadagi vaziyatning rivojlanishi diqqat bilan kuzatib borilishi” ta’kidlangan.
Gambiyani 1994-yildan beri boshqarib kelayotgan Yayya Jamme 1-dekabrda bo‘lib o‘tgan prezidentlik saylovlarida 36,7 foiz, uning muxolifatchi raqibi Adam Barrou esa 45,5 foiz ovoz oldi. 3-dekabrda Jamme mag‘lubiyatini tan oldi, biroq bir haftadan so‘ng saylov komissiyasidagi “yo‘l qo‘yib bo‘lmas kamchiliklar”ni ro‘kach qilib, yangi saylovlar o‘tkazishga chaqirdi.
Izoh (0)