БМТ Хавфсизлик кенгаши ва ташкилот бош котиби Пан Ги Мун Гамбиянинг амалдаги президенти Яйя Жаммени сайловлардаги мағлубиятини тан олиш ва 2017 йил январида лавозимини эгаллаши лозим бўлган Адам Барроуга ҳокимиятни топширишга чақирди. Бу ҳақда «ТАСС» хабар бермоқда.
ОАВ учун баёнотда кенгаш аъзолари давлатнинг амалдаги раҳбарини «Гамбия халқининг 2016 йил 1 декабрдаги азму қарорини ҳурмат қилиш ва бирон-бир шартлар ҳамда ноқонуний чўзишларсиз сайланган президентга ҳокимиятни топшириш»га даъват қилди. Шу билан бирга, барча томонлар «имкон қадар ўзини тийиш, зўравонликка йўл қўймаслик ва тинчликни сақлаш»га чақирилган ва «Гамбиядаги вазиятнинг ривожланиши диққат билан кузатиб борилиши» таъкидланган.
Гамбияни 1994 йилдан бери бошқариб келаётган Яйя Жамме 1 декабрда бўлиб ўтган президентлик сайловларида 36,7 фоиз, унинг мухолифатчи рақиби Адам Барроу эса 45,5 фоиз овоз олди. 3 декабрда Жамме мағлубиятини тан олди, бироқ бир ҳафтадан сўнг сайлов комиссиясидаги «йўл қўйиб бўлмас камчиликлар»ни рўкач қилиб, янги сайловлар ўтказишга чақирди.
Изоҳ (0)