Qozog‘istonda Lada Vesta va Lada XRAY avtomobillari ishlab chiqarila boshlandi

Qozog‘istonning “Aziya Avto” zavodida “AvtoVaz”ning yangi avlod modellari Lada - Vesta, XRAY, universal Largus va Granta liftbek avtomobillarini ishlab chiqarish yo‘lga qo‘yildi. Bu haqda 9-dekabr, juma kuni avtokonsern matbuot xizmati ma’lum qildi, deb yozadi “TASS”.

“Qozog‘iston Lada uchun birinchi raqamli eksport bozoridir. Vesta va XRAY’ning Ust-Kamenogorskda ishlab chiqarilishi respublika aholisiga zamonaviy Lada eng qat’iy xalqaro talablarga javob beruvchi zamonaviy avtomobil ekanligini his etish imkonini beradi”, — dedi konsern rahbari Nikolya Mor.

Bungacha “Aziya Avto”da uchta model — Lada 4x4 yo‘ltanlamasi, Lada Granta sedan va universal Lada Kalina ishlab chiqarilar edi.

2015-yil yakuniga ko‘ra, Qozog‘iston hududida sotilgan barcha yengil avtomobillarning 28 foizi Lada ulushiga to‘g‘ri keldi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.