Rossiyaning Xanti-Mansi muxtor okrugida operativ shtab yig‘ilishi chog‘ida 5-dekabr okrugda motam kuni deb e’lon qilinishi ma’lum bo‘ldi. Bu haqda “Interfaks”ga jamoatchilik bilan aloqalar departamenti direktori Yelena Shumakova bayonot berdi.
4-dekabr kuni okrug hududida, Xanti-Mansiysk–Tyumen trassasining 926-kilometrida avtobus va yuk mashinasi ishtirokida YTH ro‘y berdi. Avtobusda sport akrobatikasi bo‘yicha bolalar jamoasi ishtirokchilari Xanti-Mansiyskdan Nefteyuganskka qaytayotgan edi.
YTHda 25 kishi, shu jumladan, 22 bola jabrlandi. Ularning bari Xanti-Mansiyskdagi okrug klinik shifoxonasiga yetkazildi. Ko‘plarning ahvoli og‘ir deb baholanmoqda.
Avtohalokatda 12 kishi qurbon bo‘ldi, ularning aksariyati — bolalar.
Yelena Shumakovaning ma’lum qilishicha, jabrlanganlar va halok bo‘lganlarning oilalariga yordam ko‘rsatish bo‘yicha hujjat imzolanadi.
Izoh (0)