“Oilaviy ovoz berish” holatlari demokratik saylovlarning asosiy tamoyillaridan biri — har bir saylovchi faqat bir ovozga ega ekanligini nazarda tutuvchi teng saylash huquqining buzilishi hisoblanadi. Bu haqda O‘zbekiston Respublikasi Oliy Majlisining inson huquqlari bo‘yicha vakili (Ombudsman) rasmiy saytida ma’lum qilindi.
Ombudsman ofisiga ko‘ra, hozirda saylov kampaniyasi chog‘ida “oilaviy ovoz berish” holatlarining oldini olish uchun keng ko‘lamli choralar ko‘rilmoqda. Ushbu maqsadda televideniye va radioda roliklar translyatsiyasi tashkil qilindi. O‘zbekiston xotin-qizlar qo‘mitasi, “Kamolot”, “Mahalla”, “Nuroniy” va boshqa ko‘plab jamoat, nodavlat tashkilotlari tomonidan “Mening ovozim —mamlakatim kelajagi”, “Ovoz berishda shaxsan ishtirok etaman”, “Oilamizda har bir kishining o‘z ovozi bor”, “Saylash huquqiga egamiz” va boshqa aksiyalar o‘tkazilmoqda. “Oilaviy ovoz berish” holatlarini qoralovchi plakatlar 100 ming nusxada chop etildi va tarqatildi.
Ombudsman tomonidan 14-oktabrda ishga tushirilgan to‘g‘ridan-to‘g‘ri telefon liniyasiga bir oydan oshiq vaqt davomida 300 dan ortiq murojaat kelib tushdi. Jumladan, 18 kishi ishonchli ovoz berish, ya’ni saylovchi oila a’zolaridan biriga uning o‘rniga ovoz berishni ishonib topshirishi imkoniyati bilan qiziqqan.
“O‘zbekiston Respublikasi Prezidenti saylovi to‘g‘risida”gi Qonunning 31-moddasiga ko‘ra, har bir saylovchi shaxsan o‘zi ovoz beradi, boshqa kishilar uchun ovoz berishga yo‘l qo‘yilmaydi. Saylov byulleteni saylov komissiyasi tomonidan saylovchilar ro‘yxati asosida, pasport yoki shaxsni tasdiqlovchi boshqa hujjat taqdim etilganida beriladi. Har bir saylovchi mazkur byulletenni olgani haqida saylovchilar ro‘yxatidagi ismi-sharifi ro‘parasiga shaxsan imzo qo‘yadi.
Izoh (0)