«Оилавий овоз бериш» ҳолатлари демократик сайловларнинг асосий тамойилларидан бири — ҳар бир сайловчи фақат бир овозга эга эканлигини назарда тутувчи тенг сайлаш ҳуқуқининг бузилиши ҳисобланади. Бу ҳақда Ўзбекистон Республикаси Олий Мажлисининг инсон ҳуқуқлари бўйича вакили (Омбудсман) расмий сайтида маълум қилинди.
Омбудсман офисига кўра, ҳозирда сайлов кампанияси чоғида «оилавий овоз бериш» ҳолатларининг олдини олиш учун кенг кўламли чоралар кўрилмоқда. Ушбу мақсадда телевидение ва радиода роликлар трансляцияси ташкил қилинди. Ўзбекистон хотин-қизлар қўмитаси, «Камолот», «Маҳалла», «Нуроний» ва бошқа кўплаб жамоат, нодавлат ташкилотлари томонидан «Менинг овозим —мамлакатим келажаги», «Овоз беришда шахсан иштирок этаман», «Оиламизда ҳар бир кишининг ўз овози бор», «Сайлаш ҳуқуқига эгамиз» ва бошқа акциялар ўтказилмоқда. «Оилавий овоз бериш» ҳолатларини қораловчи плакатлар 100 минг нусхада чоп этилди ва тарқатилди.
Омбудсман томонидан 14 октябрда ишга туширилган тўғридан-тўғри телефон линиясига бир ойдан ошиқ вақт давомида 300 дан ортиқ мурожаат келиб тушди. Жумладан, 18 киши ишончли овоз бериш, яъни сайловчи оила аъзоларидан бирига унинг ўрнига овоз беришни ишониб топшириши имконияти билан қизиққан.
«Ўзбекистон Республикаси Президенти сайлови тўғрисида»ги Қонуннинг 31-моддасига кўра, ҳар бир сайловчи шахсан ўзи овоз беради, бошқа кишилар учун овоз беришга йўл қўйилмайди. Сайлов бюллетени сайлов комиссияси томонидан сайловчилар рўйхати асосида, паспорт ёки шахсни тасдиқловчи бошқа ҳужжат тақдим этилганида берилади. Ҳар бир сайловчи мазкур бюллетенни олгани ҳақида сайловчилар рўйхатидаги исми-шарифи рўпарасига шахсан имзо қўяди.
Изоҳ (0)