Toshkentda miniatyurachi rassomlar asarlari ko‘rgazmasi ochildi
Toshkentda miniatyurachi rassomlar asarlari ko‘rgazmasi ochildi, deb yozadi O‘zA. Buyuk musavvir Kamoliddin Behzod Sharq miniatyurasi kompozitsiyasiga peyzaj, portret janrlarini birinchilardan bo‘lib kiritgan. Uning asarlarida tasvirlar uyg‘unligi, ranglar tiniqligi va harakatlar silsilasi mohirlik bilan ifoda etilgan. Bugungi kunda miniatyura asarlari qadim an’analar mushtarakligida zamonaviy shakl va ko‘rinishda yuksak mahorat bilan yaratilmoqda.
O‘zbekiston Badiiy akademiyasi Kamoliddin Behzod nomidagi memorial bog‘-muzeyida namoyish etilayotgan “Farhod va Shirin”, “Oila”, “Donishmand ila suhbat”, ”Zarvaraq”, “Ilhom parisi”, “Anor”, “Malikani kutib olish”, “Kamoliddin Behzod shogirdlari bilan”, “Baxt qushi”, “Sab’ai sayyor”, "Qo‘g‘irchoqlar raqsi”, “Bazm”, “Orzu, chopqir otlar” kabi miniatyura asarlarida bu yanada yaqqolroq namoyon bo‘ldi.
“O‘zbekistonning hozirgi san’atida miniatyura lakli miniatyura, devoriy naqshlar, yog‘och, mato va charmdagi miniatyurani o‘z ichiga oladigan keng qamrovli badiiy-uslubiy yo‘nalishga aylandi” — deydi miniatyurachi rassom Toyir Boltaboyev.
Ko‘rgazmada K.Abdullayev, A.Karimov, K.Mirzayev, Sh.Shoahmedov, T.Karimov, H.Mirsoatov, K.Omonov, N.Xolmatov, D.Toshev, B.Hojimatov, B.Tohirov singari miniatyurachi rassomlar asarlari namoyish etilmoqda.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
