Rossiyadagi ommaviy nashrlardan biri — “Argumenti i fakti” gazetasining shu yil 24-noyabrda chop etilgan O‘zbekiston kelajakni tanlamoqda nomli maqolada mamlakatda yuz berayotgan o‘zgarishlar, xususan, 4-dekabrda o‘tkaziladigan O‘zbekiston Prezidenti saylovi haqida so‘z boradi. Maqolada, jumladan, bo‘lajak saylovning quyidagi xususiyatlariga e’tibor qaratilgan.
“Prezidentlik instituti O‘zbekiston davlat boshqaruvi tizimida o‘ta muhim o‘rin tutadi. Prezident davlat boshlig‘i hisoblanadi va davlat hokimiyati organlarining kelishilgan holda faoliyat yuritishi hamda bir-biri bilan o‘zaro muvofiqlashuvini ta’minlaydi. Huquq va erkinliklar, mamlakat Konstitutsiyasi hamda qonunlariga rioya etilishi kafolati sanaladi.
Shu bois 4-dekabrda bo‘lib o‘tadigan Prezident saylovi O‘zbekiston va uning xalqi hayotida favqulodda muhim ahamiyatga ega ijtimoiy-siyosiy voqea hisoblanadi.
O‘zbekiston Respublikasi Konstitutsiyasi milliy saylov tizimi faoliyati va jamiyat hayotining barcha sohalari demokratik tarzda rivojlanishi uchun asosiy hujjat bo‘lib xizmat qiladi. Shuningdek, davlat rahbari saylovi jarayonini tartibga soluvchi normativ aktlar qabul qilingan. “O‘zbekiston Respublikasi Prezidenti saylovi to‘g‘risida”, “Fuqarolarning saylov huquqi kafolatlari to‘g‘risida”, “O‘zbekiston Respublikasi Markaziy saylov komissiyasi to‘g‘risida” va boshqa qonunlar shular jumlasidandir.
Ushbu yo‘nalishda qabul qilingan normativ-huquqiy aktlar fuqarolarning ovoz berish huquqiga so‘zsiz rioya etilishi, saylovlarda emin-erkin ishtirok etishi uchun zarur sharoitlar yaratilishi, saylov kampaniyasi chog‘ida siyosiy partiyalar va Prezidentlikka nomzodlar uchun teng imkoniyatlar berilishini ta’minlashga qaratilgan.
Jismoniy imkoniyati cheklangan kishilarga qulay sharoit yaratish maqsadida har bir saylov uchastkasi nogironlik aravachalari uchun panduslar bilan jihozlanmoqda. Kabinalardan biri ham nogironlarga mo‘ljallangan. Ko‘zi ojizlar uchun Brayl alifbosida saylovga oid qo‘llanmalar tayyorlanmoqda. Ilk bor ular uchun maxsus saylov byulletenlari taqdim etiladi.
O‘zbekistonning har bir fuqarosiga uning saylov huquqi sud tomonidan himoya qilinishi, saylov komissiyalari, davlat organlari, mansabdor shaxslar, jamoat birlashmalarining noqonuniy harakatlari yuzasidan sudga shikoyat etish imkoniyati kafolatlangan. Fuqarolarning saylash va saylanish huquqini cheklash, bunga to‘sqinlik qilish qonunchilikka binoan javobgarlikka olib keladi.
Saylov kampaniyasi ochiq-oshkoralik va shaffoflik tamoyillari asosiga qurilgan. Mazkur jarayonda ayollarning faolligini oshirish, ularning huquq va manfaatlarini himoya qilishga alohida e’tibor berilgan. Shuningdek, Markaziy saylov komissiyasi tomonidan tasdiqlangan tadbirlar dasturida nodavlat-notijorat tashkilotlariga ham muhim o‘rin berilgan. Jamoat tashkilotlari insonning eng asosiy huquqlaridan biri — saylov huquqini himoya qilish, adolatli, erkin, ochiq va halol saylovlar o‘tkazish uchun o‘z hissasini qo‘shishga harakat qilmoqda.
Shu tariqa, O‘zbekistonda mustaqillik yillarida yaratilgan davlat boshqaruvi, demokratik institutlar va milliy qonunchilik tizimi samarali faoliyat ko‘rsatayotgani va kelajakka ishonch bilan qarashga imkon berishini qayd etish mumkin”.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)