“O‘zbekiston Respublikasi Prezidenti saylovi to‘g‘risida”gi Qonunning 5-moddasiga muvofiq, saylovga tayyorgarlik ko‘rish va uni o‘tkazishga doir tadbirlar, shuningdek, har bir saylov uchastkasida saylov kuni ovoz berish xonalarida va ovozlarni sanab chiqishda Prezidentlikka nomzodlar ko‘rsatgan siyosiy partiyalardan bittadan kuzatuvchi qatnashish huquqiga ega. Binobarin, saylovda siyosiy partiya kuzatuvchisining ishtirok etishi, uning vakolati doirasidagi vazifalarni qonundan og‘ishmagan holda bajarishi saylovning adolatli, ochiq va oshkora o‘tishiga xizmat qiladi. Bu haqda “Xalq so‘zi” gazetasi xabar bermoqda.
Markaziy saylov komissiyasining shu yil 7-oktabrda qabul qilingan qaroriga asosan, O‘zbekiston Respublikasi Prezidenti saylovida qatnashuvchi siyosiy partiyalarning kuzatuvchilari to‘g‘risidagi nizom tasdiqlandi. Unga ko‘ra, kuzatuvchining asosiy vazifasi saylovga tayyorgarlik ko‘rish va uni o‘tkazishga doir tadbirlarda partiya manfaatlarini ko‘zlab, saylov qonunchiligiga to‘liq rioya etilishi ustidan jamoatchilik nazoratini amalga oshirishdan iborat.
Muayyan siyosiy partiyaning a’zosi, uning tarafdori yoxud mazkur siyosiy partiyaga xayrixoh bo‘lgan O‘zbekiston Respublikasining 18 yoshga to‘lgan fuqarosi ushbu siyosiy partiyadan kuzatuvchi sifatida ishtirok etishga haqli.
Hozirgi vaqtda O‘zbekiston Respublikasi Prezidentligiga nomzod ko‘rsatgan siyosiy partiyalar o‘z kuzatuvchilari tarkibini shakllantirdi. Dastlabki ma’lumotlarga ko‘ra, okrug saylov komissiyalari tomonidan siyosiy partiyalarning 37 ming 500 nafarga yaqin kuzatuvchisi ro‘yxatdan o‘tkazilib, ularga mandatlar berilgan. Siyosiy partiyalar saylov shtablari tomonidan kuzatuvchilarining siyosiy-huquqiy bilimlarini yanada yuksaltirish bo‘yicha amaliy ishlar olib borilmoqda.
O‘zbekiston “Milliy tiklanish” demokratik partiyasi Markaziy saylov shtabi tomonidan onlayn tarzida o‘tkazilgan respublika o‘quv seminari kuzatuvchilarning saylovda munosib ishtirok etishiga bag‘ishlandi. Markaziy saylov komissiyasi mas’ul xodimlari, Oliy Majlis Qonunchilik palatasi deputatlari, Adliya vazirligi, Fuqarolik jamiyati shakllanishini monitoring qilish mustaqil instituti mutaxassislari hamda hududiy partiya tashkilotlari rahbarlari va partiya kuzatuvchilari qatnashgan tadbirda milliy saylov qonunchiligiga kiritilgan o‘zgartish hamda qo‘shimchalarning mazmun-mohiyati atroflicha tahlil qilindi.
Tadbirkorlar va ishbilarmonlar harakati — O‘zbekiston Liberal-demokratik partiyasi ham saylov kampaniyasining eng muhim pallasida partiya manfaatlarini himoya qilish, ovoz berishning qonun talablariga og‘ishmasdan o‘tkazilishi ustidan jamoatchilik nazoratini olib borish maqsadida o‘z kuzatuvchilari salohiyatini oshirishga, bilim va ko‘nikmalarini yanada mustahkamlashga alohida e’tibor qaratmoqda. Partiya faollari orasidan 9 ming 335 nafar kuzatuvchi tayinlanib, okrug saylov komissiyalarida ro‘yxatdan o‘tkazildi.
O‘zbekiston Xalq demokratik partiyasi Markaziy saylov shtabi ham kuzatuvchilarning siyosiy va huquqiy bilimini oshirish, ularning huquq hamda vazifalarini keng tushuntirishga alohida e’tibor qaratmoqda.
— Saylovlarning ochiq va oshkoraligi, shaffofligini kafolatlashning muhim omili sanalgan kuzatuvlar dastlabki hamda asosiy davrga bo‘linadi, — deydi O‘zbekiston Xalq demokratik partiyasi Markaziy saylov shtabi rahbari R. Kamilov. — Dastlabki kuzatuv davri saylov kuniga qadar bo‘lgan jarayonni qamrab oladi. Bundan tashqari, kuzatuvchi tomonidan okrug va uchastka saylov komissiyalarining majlislarida, saylovoldi tashviqoti vaqtida hamda ovoz berishdan bir kun oldin siyosiy partiya manfaatlarini himoya qilish maqsadida kuzatuv amalga oshiriladi. Uchastka saylov komissiyasi ovoz berish kuni o‘z ishini boshlagan paytdan to saylov natijalari haqidagi bayonnoma imzolanib, kuzatuvchi tomonidan uning nusxasi olingunga qadar bo‘lgan vaqt asosiy kuzatuv davri hisoblanadi. Kuzatuvchilarimiz mana shu jarayonlarda faollik hamda ziyraklik ko‘rsatishi, partiya manfaatlarini himoya qilib, jamoatchilik nazoratini samarali amalga oshirishi zarur.
O‘zbekiston “Adolat” sotsial-demokratik partiyasi ham saylovda kuzatuvchi institutidan samarali foydalanishga alohida e’tibor qaratmoqda. Xususan, shu kunga qadar partiyaning 9 ming 335 nafar kuzatuvchisi okrug saylov komissiyalari tomonidan ro‘yxatga olindi. Hozirgi vaqtda partiya kuzatuvchilarini saylov kuni ovoz berish jarayonini kuzatishga tayyorlash yuzasidan faol ish olib borilmoqda.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)