O‘zbekiston kasaba uyushmalari Federatsiyasida Xalqaro moliya korporatsiyasining (IFC) ijtimoiy mas’uliyatli va ekologik barqaror paxta yetishtirish loyihasini amalga oshirish Rejasi muhokamasi bo‘lib o‘tdi. Bu haqda “Daryo”ga Federatsiya matbuot xizmati ma’lum qildi.
BCI — paxta yetishtirish uslublarini yaxshilash, xususan, paxtachilikning ekologiya va inson salomatligiga ta’sirini kamaytirishga chaqiruvchi xalqaro notijorat tashkiloti. H&M, Levi’s, Adidas, Nike va boshqa mashhur brendlar BCI dasturi asosida yetishtirilgan paxta xomashyosini sotib oladi.
Xalqaro moliya korporatsiya vakillarining fikricha, BCI uslubidan foydalanish o‘zbek fermerlariga tannarxni pasaytirgan holda paxta yetishtirish hajmini oshirish, tekstil ishlab chiqaruvchilariga esa jahon bozorida o‘z mavqelarini mustahkamlash imkonini beradi.
O‘zbek tomoni mazkur Rejani yanada takomillashtirish yuzasidan bir qator takliflarni bildirdi. Jumladan, paxta yetishtirish texnologik kartasini ishlab chiqish, tegishli mutaxassislarni tizimli o‘qitish, loyihani amalga oshirish jarayonini avtomatlashtirish, qayta aloqa mexanizmini tashkillash, sherik tariqasida Qishloq va suv xo‘jaligi vazirligi, O‘zbekiston fermerlar kengashini jalb etish, loyiha uchun tanlab olinadigan fermerlar guruhlarini xalqaro mehnat standartlariga o‘rgatish va boshqa masalalarda O‘zbekiston kasaba uyushmalari Federatsiyasi salohiyatidan foydalanish taklif qilindi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)