Markaziy saylov komissiyasi taklifiga binoan O‘zbekiston Respublikasi Prezidenti saylovini kuzatishda YXHT Demokratik institutlar va inson huquqlari bo‘yicha byurosi, ShHT, Butunjahon saylov organlari assotsiatsiyasi, Islom hamkorlik tashkiloti, MDH Ijroqo‘mi missiyalari, Osiyo, Yevropa, Afrika va Amerika qit’asining qirqdan ortiq davlatlaridan xorijlik ekspertlar ishtirok etadi. Bugungi kunda ularning aksariyati saylov jarayonini bevosita mamlakat hududlarida, O‘zbekistonning chet davlatlardagi vakolatxonalarida tuzilgan saylov uchastkalarida kuzatib bormoqda. “Jahon” axborot agentligi ekspertlarning bo‘lajak saylovlar haqidagi fikrlari bilan qiziqdi.
Xilel Nyuman,Isroil tashqi ishlar vazirligi strategik tadqiqotlar departamenti sektor boshlig‘i, Isroilning O‘zbekistondagi sobiq elchisi:
— Hozirgi kunda xalqaro hamjamiyatning e’tibori O‘zbekiston Respublikasi Prezidenti saylovi kampaniyasiga qaratilgan. Bu bejiz emas. Chunki O‘zbekiston Markaziy Osiyoda aholi soni ko‘pligi bo‘yicha eng yirik mamlakat sifatida mintaqa ijtimoiy-siyosiy hamda iqtisodiy rivojlanishi va xavfsizligini ta’minlashda muhim rol o‘ynaydi. Aynan shu omillar sabab ham dunyo jamoatchiligi tomonidan O‘zbekistondagi saylovlarga alohida qiziqish bilan qaralmoqda.
Saylovoldi kampaniyasida barcha siyosiy partiyalar ishtirok etayapti. Bu esa siyosiy raqobat mavjudligi haqida so‘z yuritish uchun asos bo‘ladi. Saylov qonunchiligi erkinlashtirilgani, partiyalarga hokimiyat uchun kurash huquqi berilgani, fuqarolik jamiyati institutlarining saylov jarayoniga faol jalb qilingani, ko‘p sonli xalqaro kuzatuvchilar akkreditatsiyadan o‘tkazilgani ham O‘zbekistonning demokratiya va ochiqlikni ta’minlash borasida dadil borayotganidan dalolatdir.
Rafael Bueno,Casa Asia siyosiy, ijtimoiy va ta’lim dasturlari instituti direktori (Ispaniya):
— O‘zbekiston Respublikasi Birinchi Prezidenti Islom Karimov tomonidan ishlab chiqilgan taraqqiyotning “o‘zbek modeli” asosida mamlakat tarixan qisqa davrda ulkan marralarni qo‘lga kiritishga muvaffaq bo‘ldi. Bu borada yurtda barqarorlik, tinchlik, jadal rivojlanayotgan iqtisodiyotni alohida ko‘rsatib o‘tgan bo‘lardim. O‘tgan davrda demokratiyaning asosiy ko‘rinishlari, ya’ni erkin saylovlar instituti, shaffof saylov tizimi, ko‘ppartiyaviylik va milliy parlamentni mustahkamlash uchun muhim huquqiy asoslar yaratildi. Shu yilning 4-dekabr kuni bo‘ladigan Prezident saylovi ham O‘zbekistonning istiqboldagi rivojlanishida yangi bosqichni boshlab berishi bilan ahamiyatlidir.
Izoh (0)