Xatamjon Ketmonov Buxorodagi uchrashuvda “o‘rta korxona” tushunchasini amaliyotga kiritishni taklif qildi

O‘zbekiston Xalq demokratik partiyasidan O‘zbekiston Respublikasi Prezidentligiga nomzod Xatamjon Ketmonov 16-noyabr, chorshanba kuni Buxoro viloyati saylovchilari bilan uchrashdi. Bu haqda O‘zA xabar bermoqda.

Videokonferensiya tarzida tashkil etilgan uchrashuvni O‘zbekiston Respublikasi Oliy Majlisi Qonunchilik palatasi deputati F.Umarov ochdi. Prezidentlikka nomzodning ishonchli vakili R.Kozimova yig‘ilganlarni nomzodning tarjimai holi bilan tanishtirdi.

Prezidentlikka nomzod o‘z saylovoldi dasturi yuzasidan nutq so‘zladi.

Dastur partiyaning g‘oya va dasturiy maqsadlari, xususan, Oliy Majlis Qonunchilik palatasidagi O‘zbekiston Xalq demokratik partiyasi fraksiyasining parlamentdagi ko‘pchilik – Demokratik kuchlar blokiga nisbatan o‘zini muxolifat, deb e’lon qilgani, muxolif fraksiya sifatida ilgari surgan qator g‘oyalariga asoslanadi.

Dasturda qishloq xo‘jaligi mahsulotlarini qayta ishlashda oilaviy tadbirkorlik va kasanachilikni rivojlantirish, korxonalar tasnifiga “o‘rta korxona” tushunchasini kiritish, ya’ni yirik, o‘rta va kichik korxonalar mezonlarini belgilash, kichik korxonalarning yiriklashishi va yanada rivojlanishiga xizmat qiladigan soliq va imtiyozlar tizimini ishlab chiqish taklifi ilgari surildi.

Qurilish tashkilotlarining moddiy-texnik ta’minotini yaxshilash, sohaga yangi texnologiyalarni joriy qilish, malakali mutaxassislarni yollashga imkoniyat beruvchi sharoitlar yaratish maqsadida soliq yukini kamaytirish, yangi ish o‘rinlari yaratish, buning uchun muntazam o‘tkaziladigan ish o‘rinlari yarmarkalarini yanada kengaytirish, hududlarni ijtimoiy-iqtisodiy rivojlantirish dasturlarini tuzishda joriy va istiqboldagi taraqqiyot yo‘nalishlarini to‘g‘ri va aniq belgilab olishga ham alohida e’tibor qaratildi.

Uchrashuvda Buxoro davlat universiteti magistranti Sh.Bobojonov, Shofirkon tumanidagi “Guliston” mahalla fuqarolar yig‘ini maslahatchisi S.Yusupova, “Vatanparvar” tashkiloti Buxoro viloyati kengashi raisi O.Qudratov, Vobkent tumanidagi “Barkamol avlod” bolalar markazi direktori R.Hayitova, Peshku sanoat kasb-hunar kolleji o‘qituvchisi M.Safoyeva nomzodning saylovoldi dasturi haqida fikrlarini bildirdi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.