Марказий сайлов комиссияси таклифига биноан Ўзбекистон Республикаси Президенти сайловини кузатишда ЕХҲТ Демократик институтлар ва инсон ҳуқуқлари бўйича бюроси, ШҲТ, Бутунжаҳон сайлов органлари ассоциацияси, Ислом ҳамкорлик ташкилоти, МДҲ Ижроқўми миссиялари, Осиё, Европа, Африка ва Америка қитъасининг қирқдан ортиқ давлатларидан хорижлик экспертлар иштирок этади. Бугунги кунда уларнинг аксарияти сайлов жараёнини бевосита мамлакат ҳудудларида, Ўзбекистоннинг чет давлатлардаги ваколатхоналарида тузилган сайлов участкаларида кузатиб бормоқда. «Жаҳон» ахборот агентлиги экспертларнинг бўлажак сайловлар ҳақидаги фикрлари билан қизиқди.
Хилел Ньюман,Исроил ташқи ишлар вазирлиги стратегик тадқиқотлар департаменти сектор бошлиғи, Исроилнинг Ўзбекистондаги собиқ элчиси:
— Ҳозирги кунда халқаро ҳамжамиятнинг эътибори Ўзбекистон Республикаси Президенти сайлови кампаниясига қаратилган. Бу бежиз эмас. Чунки Ўзбекистон Марказий Осиёда аҳоли сони кўплиги бўйича энг йирик мамлакат сифатида минтақа ижтимоий-сиёсий ҳамда иқтисодий ривожланиши ва хавфсизлигини таъминлашда муҳим рол ўйнайди. Айнан шу омиллар сабаб ҳам дунё жамоатчилиги томонидан Ўзбекистондаги сайловларга алоҳида қизиқиш билан қаралмоқда.
Сайловолди кампаниясида барча сиёсий партиялар иштирок этаяпти. Бу эса сиёсий рақобат мавжудлиги ҳақида сўз юритиш учун асос бўлади. Сайлов қонунчилиги эркинлаштирилгани, партияларга ҳокимият учун кураш ҳуқуқи берилгани, фуқаролик жамияти институтларининг сайлов жараёнига фаол жалб қилингани, кўп сонли халқаро кузатувчилар аккредитациядан ўтказилгани ҳам Ўзбекистоннинг демократия ва очиқликни таъминлаш борасида дадил бораётганидан далолатдир.
Рафаэль Буэно,Casa Asia сиёсий, ижтимоий ва таълим дастурлари институти директори (Испания):
— Ўзбекистон Республикаси Биринчи Президенти Ислом Каримов томонидан ишлаб чиқилган тараққиётнинг «ўзбек модели» асосида мамлакат тарихан қисқа даврда улкан марраларни қўлга киритишга муваффақ бўлди. Бу борада юртда барқарорлик, тинчлик, жадал ривожланаётган иқтисодиётни алоҳида кўрсатиб ўтган бўлардим. Ўтган даврда демократиянинг асосий кўринишлари, яъни эркин сайловлар институти, шаффоф сайлов тизими, кўппартиявийлик ва миллий парламентни мустаҳкамлаш учун муҳим ҳуқуқий асослар яратилди. Шу йилнинг 4 декабрь куни бўладиган Президент сайлови ҳам Ўзбекистоннинг истиқболдаги ривожланишида янги босқични бошлаб бериши билан аҳамиятлидир.
Изоҳ (0)