2010-yilda Smolensk yaqinidagi aviahalokatda qurbon bo‘lgan Polsha sobiq prezidenti Lex Kachinskiy va rafiqasi Mariyaning jasadi Krakovda qabrdan kovlab olindi (eksgumatsiya qilindi), deb yozadi “Gazeta.pl”.
Vavel qasridagi jasadlarni kovlab olish sakkiz soat davom etdi. Eksgumatsiyada marhum prezidentning qizi Marta Kachinskaya va uning egizagi Yaroslav Kachinskiy qatnashdi.
Lex Kachinskiy va rafiqasining jasadlarini eksgumatsiya qilish 2010-yilgi aviahalokatning boshqa qurbonlariga nisbatan 83 ta bunday jarayonning birinchisi bo‘ldi.
Jasadlar Yagellon universitetining Collegium Medicum sud tibbiyoti muassasasiga yetkazildi.
Jasadlarni o‘rganish uchun to‘rt kun vaqt ketishi taxmin qilinmoqda, qayta dafn marosimi esa 18-noyabrga belgilangan.
Polsha bosh prokurori o‘rinbosari Marek Pashchonek avvalroq aviahalokat qurbonlarini eksgumatsiya qilishga tibbiy hujjatlarda aniqlangan xatolik tufayli zarurat tug‘ilganini aytgan edi.
To‘plangan hujjatlarni o‘rganib chiqadigan xalqaro ekspertlar guruhi eksgumatsiyadan so‘ng to‘rt oy davomida hisobot tuzishi kerak.
Bortida Polsha prezidenti Lex Kachinskiy va mamlakat rahbariyati vakillari bo‘lgan Tu-154 samolyoti 2010-yil 10-aprelda Rossiyaning Smolensk aerodromiga qo‘nish chog‘ida qulagan. Sakkiz nafar ekipaj a’zosi va 88 yo‘lovchining barchasi halok bo‘lgan.
Izoh (0)