AQShning yangi saylangan prezidenti Donald Tramp o‘z prezidentligining ilk bosqichida IShID terrorchilik guruhini yo‘q qilishga tashqi siyosat sohasidagi birlamchi vazifalaridan biri sifatida kirishadi. Bu haqda Trampning asosiy maslahatchilaridan biri, Nyu-York sobiq meri Rudolf Juliani ma’lum qildi, deb yozadi “TASS”.
Shuningdek, Juliani Yaqin Sharq va dunyoning boshqa mintaqalariga aloqador masalalarni hal qilishni respublikachi ilk bosqichda keyinga qoldirishini aytib o‘tdi.
“IShID qisqa muddatli istiqbolda eng katta xavfni tug‘diradi, bu IShID Iroq va Suriyada faoliyat yuritgani uchun emas, balki IShID ‘Al-Qoida’ erisha olmagan narsaga — butun dunyoga tarqalishga muvaffaq bo‘lgani uchundir”, — deya ta’kidladi Juliani.
Bundan tashqari, Juliani Amerika qo‘shinlarining 2003-yilda Iroqqa bostirib borganini tanqid qildi va buni AQShning “eng katta tashqi siyosiy xatolaridan biri” deb atadi.
IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.
Izoh (0)