Trampning jamoasi uning farzandlarini maxfiy axborotga yaqinlashtirish ustida ish olib borilayotganini rad etdi

AQShning yangi saylangan prezidenti Donald Tramp jamoasi OAVlarning u o‘z farzandlarini mutlaqo maxfiy davlat ma’lumotlariga yaqinlashtirmoqchi ekanligi haqidagi xabarlarini rad etdi, deb yozadi “TASS”.

Milliarderning vakili ushbu xabarlarni rad etdi va Trampning farzandlari maxfiy hujjatlardan foydalanish uchun zarur hujjatlarni to‘ldirishga kirishgani ham yo‘qligini aytdi. “Bu (zarur anketalarni to‘ldirish) aynan hozir bo‘ladi deb o‘ylamayman”, — dedi biznesmenning vakili.

Avvalroq milliarderning yordamchilari Oq uy vakillaridan respublikachining farzandlari mutlaqo maxfiy axborotdan foydalanish huquqiga ega bo‘lishi ehtimolini ko‘rib chiqishni so‘ragani haqida xabar berilgan edi.

Ayni paytda maxfiy axborotdan foydalanish huquqi uchun AQSh ma’muriyati biznesmenning bolalarini uning milliy xavfsizlik bo‘yicha yordamchilari vazifasiga tayinlashi kerak. Yanvar oyidagi inauguratsiyasidan keyin esa Tramp buni o‘z qarori bilan qila oladi.