AQSh prezidenti saylovida Donald Trampga mag‘lub bo‘lgan Hillari Klinton saylovdan keyin ilk bor Nyu-Yorkdagi tarafdorlari oldida chiqish qildi. TJournal’ning yozishicha, nutq Klintonning Facebook’dagi sahifasi orqali to‘g‘ridan-to‘g‘ri translyatsiya qilingan.
Klinton saylov u kutgan natija bilan tugamagan bo‘lsa-da, Tramp yaxshi prezident bo‘lishiga umid bildirdi. Klintonning fikricha, uni Amerikaning eng yaxshi qismi qo‘llab-quvvatladi va saylovda g‘alaba qozona olmagani uchun u o‘z tarafdorlaridan uzr so‘radi.
“O‘tgan tunda Trampni tabrikladim va unga mamlakatimiz nomidan birgalikda ishlashni taklif qildim. Biz shunday natijaga erishamiz deb bunchalik ko‘p ishlamagan edik va men g‘alaba qozona olmaganimiz uchun uzr so‘rayman... Bu og‘riqli holat va uzoq vaqtgacha shunday bo‘lib qoladi. Biroq yodda tuting: bizning kampaniyamiz bir kishi yoki bir saylov haqida emas. U biz sevadigan mamlakat, umidlarga to‘la va katta qalb sohibi bo‘lgan Amerika haqida edi”, — dedi Hillari Klinton.
Hillari Klintonning qayd etishicha, u nafaqat qo‘llab-quvvatlaydigan, balki ardoqlaydigan konstitutsiyaviy demokratiyaning asosiy qadriyati — hokimiyatni tinch yo‘l bilan topshirish va uning izchilligidir. Ayni vaqtda, uning yodga solishicha, qonun ustuvorligi ham Amerika tizimining yanada muhim o‘ziga xosligi sanaladi.
Klinton prezidentlik poygasidagi sherigi, endi Virjiniyadan senatorlik o‘rni uchun “birinchi qatorda turib kurashni davom ettiradigan” Tim Keynga, shuningdek, kampaniya vaqtida uni qo‘llab-quvvatlab turgan AQShning amaldagi prezidenti Barak Obama va uning turmush o‘rtog‘i Mishelga alohida minnatdorchilik bildirdi.
Hillarining chiqishidan so‘ng, Oq uy oldidagi hovlida Barak Obama ham o‘z matbuot anjumanini o‘tkazdi. Obamaning so‘zlariga ko‘ra, saylov natijalaridan ranjimaslik kerak, chunki saylovchilar demokratlar yoki respublikachilar emas, balki, avvalo, amerikaliklardir. Amaldagi prezidentning qo‘shimcha qilishicha, Trampning g‘alaba nutqini tinglab va u bilan shaxsan suhbatlashib, Obama ruhlangan, chunki Tramp — Amerikaga kerakli birlashish ruhi sohibidir.
Obama hokimiyatni topshirish jarayoni Amerika demokratiyasining asosiy tamoyillaridan biri ekanligini qayd etib, jarayon tinch o‘tishiga va’da berdi. “Keyingi bir necha oy davomida biz buni butun dunyoga namoyish etamiz”, — dedi Obama.
Obama hokimiyatni Trampga topshirish bo‘yicha bo‘lajak jarayonni 2008-yili o‘zi va Jorj Bush o‘rtasida yuz bergan holatga qiyosladi. O‘shanda, Obamaning so‘zlariga ko‘ra, u va Bushning qarashlari turlicha bo‘lganiga qaramay, Bush prezidentlik institutini shaxsiy kelishmovchiliklardan yuqori qo‘ya olib, o‘zini ham professional, ham inson sifatida namoyon etgan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)