Клинтон ва Обама қонун устуворлиги ва Трампни президент сифатида қабул қилиш ҳақидаги нутқлар билан чиқиш қилди

АҚШ президенти сайловида Дональд Трампга мағлуб бўлган Ҳиллари Клинтон сайловдан кейин илк бор Нью-Йоркдаги тарафдорлари олдида чиқиш қилди. TJournal’нинг ёзишича, нутқ Клинтоннинг Facebook’даги саҳифаси орқали тўғридан-тўғри трансляция қилинган.

Клинтон сайлов у кутган натижа билан тугамаган бўлса-да, Трамп яхши президент бўлишига умид билдирди. Клинтоннинг фикрича, уни Американинг энг яхши қисми қўллаб-қувватлади ва сайловда ғалаба қозона олмагани учун у ўз тарафдорларидан узр сўради.

«Ўтган тунда Трампни табрикладим ва унга мамлакатимиз номидан биргаликда ишлашни таклиф қилдим. Биз шундай натижага эришамиз деб бунчалик кўп ишламаган эдик ва мен ғалаба қозона олмаганимиз учун узр сўрайман... Бу оғриқли ҳолат ва узоқ вақтгача шундай бўлиб қолади. Бироқ ёдда тутинг: бизнинг кампаниямиз бир киши ёки бир сайлов ҳақида эмас. У биз севадиган мамлакат, умидларга тўла ва катта қалб соҳиби бўлган Америка ҳақида эди», — деди Ҳиллари Клинтон.

Ҳиллари Клинтоннинг қайд этишича, у нафақат қўллаб-қувватлайдиган, балки ардоқлайдиган конституциявий демократиянинг асосий қадрияти — ҳокимиятни тинч йўл билан топшириш ва унинг изчиллигидир. Айни вақтда, унинг ёдга солишича, қонун устуворлиги ҳам Америка тизимининг янада муҳим ўзига хослиги саналади.

Клинтон президентлик пойгасидаги шериги, энди Виржиниядан сенаторлик ўрни учун «биринчи қаторда туриб курашни давом эттирадиган» Тим Кейнга, шунингдек, кампания вақтида уни қўллаб-қувватлаб турган АҚШнинг амалдаги президенти Барак Обама ва унинг турмуш ўртоғи Мишелга алоҳида миннатдорчилик билдирди.

Ҳилларининг чиқишидан сўнг, Оқ уй олдидаги ҳовлида Барак Обама ҳам ўз матбуот анжуманини ўтказди. Обаманинг сўзларига кўра, сайлов натижаларидан ранжимаслик керак, чунки сайловчилар демократлар ёки республикачилар эмас, балки, аввало, америкаликлардир. Амалдаги президентнинг қўшимча қилишича, Трампнинг ғалаба нутқини тинглаб ва у билан шахсан суҳбатлашиб, Обама руҳланган, чунки Трамп — Америкага керакли бирлашиш руҳи соҳибидир.

Обама ҳокимиятни топшириш жараёни Америка демократиясининг асосий тамойилларидан бири эканлигини қайд этиб, жараён тинч ўтишига ваъда берди. «Кейинги бир неча ой давомида биз буни бутун дунёга намойиш этамиз», — деди Обама.

Обама ҳокимиятни Трампга топшириш бўйича бўлажак жараённи 2008 йили ўзи ва Жорж Буш ўртасида юз берган ҳолатга қиёслади. Ўшанда, Обаманинг сўзларига кўра, у ва Бушнинг қарашлари турлича бўлганига қарамай, Буш президентлик институтини шахсий келишмовчиликлардан юқори қўя олиб, ўзини ҳам профессионал, ҳам инсон сифатида намоён этган эди.

Диққат, диққат! «Дарё»нинг Telegram’даги расмий канали — «Toshqin ‘Daryo’»га обуна бўлиб, янгиликлардан овозли кўринишда баҳраманд бўлишингиз мумкин.