O‘zbekiston Respublikasi prezidentligiga O‘zXDPdan ko‘rsatilgan nomzod Hotamjon Ketmonov Toshkent shahri saylovchilari bilan uchrashdi. “Turkiston” saroyining katta majlislar zalida bo‘lib o‘tgan uchrashuv bir vaqtning o‘zida poytaxtning barcha tumanlaridagi saylovchilar bilan onlayn video-konferensiya shaklida tashkil etildi. Bu haqda “Daryo”ga partiya matbuot xizmati ma’lum qildi.
Tadbirni O‘zbekiston Respublikasi Oliy Majlisi Qonunchilik palatasi deputati Abdug‘affor Qirg‘izboyev ochdi va olib bordi. Nomzodning ishonchli vakili Haydar Boboxonov Hotamjon Ketmonovning tarjimai holi bilan yig‘ilganlarni tanishtirdi. Shundan so‘ng so‘z O‘zbekiston Respublikasi Prezidentligiga nomzodga berildi.
Hotamjon Ketmonov Toshkentning mamlakat iqtisodiyotida tutgan o‘rniga alohida to‘xtalib, yalpi ichki mahsulotning 17 foizga yaqini, sanoat ishlab chiqarishning 18 foizdan oshig‘i, investitsiyalarning 18 foizga yaqini, savdo aylanmasining 21 foizdan, xizmatlarning 30 foizdan, tashqi savdo aylanmasining 37 foizdan, eksportning 28 foizdan ortig‘i poytaxt hissasiga to‘g‘ri kelishini ta’kidladi.
Nomzod shahar aholisining siyosiy ongi va tafakkuri, madaniyati, mamlakatda amalga oshirilayotgan islohotlarga nisbatan daxldorlik tuyg‘usi nihoyatda yuksak ekanligini ta’kidlab, bu huquqiy davlat va ochiq fuqarolik jamiyatini barpo etishning eng muhim sharti hisoblanishi, ayniqsa saylovlar jarayonida muhim ahamiyat kasb etadigan asosiy omil ekanligini aytib o‘tdi.
Poytaxt ahli uchun muhim bo‘lgan masala — aholiga kommunal xizmatlar ko‘rsatish tariflarining davlat tomonidan tartibga solinishini takomillashtirish orqali kommunal xizmatlar narxlarini maqbullashtirish, aholi bandligini ta’minlashning mutlaqo yangi va zamonaviy usullarini joriy qilish, ish o‘rinlarini tashkil etish dasturining so‘zsiz bajarilishi ustidan parlament nazoratini kuchaytirish, barqaror ish o‘rinlari soni bilan o‘rta maxsus va oliy ta’lim muassasalarining bitiruvchilarini ishga joylashtirishning o‘zaro bog‘liqligini ta’minlash lozimligi haqida to‘xtaldi.
Shundan so‘ng ma’ruza yuzasidan bir qator ishtirokchilar so‘zga chiqdilar. Ular o‘z chiqishlarida nomzod dasturida ilgari surilayotgan tijorat banklarining investitsiyaviy loyihalarni moliyalashtirishdagi ishtirokini yanada kengaytirish, xo‘jalik yurituvchi subyektlarni kreditlash tizimini soddalashtirish, makroiqtisodiy vaziyatdan kelib chiqib, foiz stavkalarini minimal darajada belgilash, muammoli qarzlar yuzaga kelishiga yo‘l qo‘ymaslik, bank xizmatlari sifatini yaxshilash orqali ularning investitsiyaviy faolligini kuchaytirish, mahsulot yetkazuvchilarga o‘zaro erkin raqobatlashishiga imkon beradigan ochiq va oshkora elektron savdolar yo‘nalishini kengaytirish orqali davlat xaridlarini amalga oshirish tizimini takomillashtirish zarurligi to‘g‘risidagi fikrlarini qo‘llab-quvvatladi.
Shundan so‘ng savol-javoblarga navbat berildi. Unda saylovchilar o‘zlarini qiziqtirgan savollarga nomzod va uning ishonchli vakillaridan atroflicha javob olish imkoniga ega bo‘ldi.
Izoh (0)