“Obod” bosh murabbiyi Ja’far Irismetov Samvel Babayanning fikrlariga qo‘shilmasligini ma’lum qildi

Toshkentning “Obod” klubini boshqarayotgan mutaxassis Ja’far Irismetov Rossiyaning “Chempionat” nashri bilan suhbatda bo‘ldi. Asosan Moskvaning “Spartak” klubidagi faoliyati haqida hikoya qilgan Irismetov jurnalist Mark Bessonovning o‘zbek futboli haqida savoliga ham javob qaytargan.

“O‘zbekiston milliy terma jamoasining amaldagi bosh murabbiyi Samvel Babayan yaqindagina ‘Chempionat’ga intervyu berib, mahalliy futbol o‘sib borayotgani haqida aytib o‘tgandi. Chindan ham shundaymi?”, — deb berilgan savolga Irismetov quyidagicha javob berdi:

“Sizga aynan Samvel Vyacheslavovich kabi javob beraymi yoki aslida men qanday o‘ylashimni aytaymi? (kuladi). O‘ylashimcha, bizning futbol so‘nggi yillarda o‘smayapti, aksincha pastga qarab ketmoqda. Bolalar va o‘smirlar futboli oqsayotganini ko‘rish mumkin. Mana yoshlarimiz mundialiga chiqa olmadi, vaholanki so‘nggi yillarda jamoamizni Jahon Chempionatlarida ko‘rishga o‘rganib qolgandik”.

Shundan so‘ng jurnalist “Axir milliy terma jamoa Rossiya mundialiga chiqishga yaqin-ku” qabilida savol berdi:

“Tortishmayman. Babayan natija ko‘rsatmoqda, lekin Eronga qarshi so‘nggi o‘yin muammolarimizni ko‘rsatib qo‘ydi. O‘zbekiston termasiga saviyali futbolchilar yetishmaydi. Ahmedov va Denisov futbolni tugatgach, ularni kim almashtiradi? Men o‘z chempionatimni yaxshi bilaman, shu yerda ishlayman. Aytishim kerakki, termani kuchaytirishi mumkin bo‘lgan hech kim yo‘q”, — deb ta’kidlagan Irismetov.