O‘zbekiston Respublikasi prezidentligiga O‘zbekiston XDPdan ko‘rsatilgan nomzod Hotamjon Ketmonov 5-noyabr, shanba kuni Farg‘ona viloyati saylovchilari bilan uchrashdi. Onlayn videokonferensiya shaklida viloyatning barcha tuman va shaharlaridagi saylovchilarni qamrab olgan tadbirni O‘zbekiston Respublikasi Oliy Majlisi Qonunchilik palatasi deputati Abdug‘affor Qirg‘izboyev ochdi va olib bordi. Bu haqda partiya matbuot xizmati ma’lum qildi.
Nomzodning ishonchli vakili Dilbar Mamajanova so‘z olib, Hotamjon Ketmonovning tarjimai holi bilan yig‘ilganlarni tanishtirdi. Shundan so‘ng so‘z O‘zbekiston Respublikasi Prezidentligiga nomzodga berildi.
Hotamjon Ketmonov o‘z ma’ruzasi orqali saylovoldi dasturining asosiy yo‘nalishlari yuzasidan yig‘ilganlarga batafsil ma’lumot berdi. Jumladan, dastur partiyaning muxolif fraksiya sifatida ilgari surgan qator g‘oyalarga asoslanishini ta’kidlab, eng kam iste’mol xarajatlari (iste’mol savatchasi) standartlarini belgilashning asoslangan va zamonaviy mexanizmlarini ishlab chiqish hamda joriy qilish, aholiga kommunal xizmatlar ko‘rsatish tariflarining davlat tomonidan tartibga solinishini takomillashtirish orqali kommunal xizmatlar narxlarini maqbullashtirish, aholi bandligini ta’minlashning mutlaqo yangi va zamonaviy usullarini joriy qilish, ish o‘rinlarini tashkil etish dasturining so‘zsiz bajarilishi ustidan parlament nazoratini kuchaytirish, barqaror ish o‘rinlari soni bilan o‘rta maxsus va oliy ta’lim muassasalari bitiruvchilarini ishga joylashtirishning o‘zaro bog‘liqligini ta’minlash lozimligi haqida to‘xtaldi.
Nomzod iqtisodiy siyosatdagi ustuvor vazifa davlatning moliyaviy-iqtisodiy qudratini oshirishni kuchli ijtimoiy siyosat bilan uyg‘unlashtirish orqali aholi, xususan, uning ehtiyojmand qatlamlarining turmush darajasini yanada yaxshilashga yo‘naltirishdan iborat ekanligi, bunda esa “Iqtisodiy islohotlarga ijtimoiy samaradorlik!” shiorini ilgari surishini ta’kidladi.
Shuningdek, iqtisodiy islohotlarni amalga oshirishda budjet mablag‘lari, ayniqsa, ijtimoiy sohaga yo‘naltiriladigan mablag‘larning maqsadli ravishda sarflanishi ustidan qat’iy nazoratni kuchaytirish, davlatning o‘sib borayotgan iqtisodiy imkoniyatlaridan aholining barcha qatlamlari, eng avvalo, kam ta’minlangan qatlamining turmush darajasini yaxshilashda foydalanish, zamonaviy texnika va texnologiyalardan foydalanish asosida xo‘jalik yurituvchi subyektlar tomonidan ishlab chiqarilayotgan tovarlar va xizmatlar sifatini oshirish, tannarxini pasaytirish, shuningdek, ularning eksport imkoniyatlarini kengaytiruvchi va aholining xarid qobiliyatini oshirishga xizmat qiluvchi raqobat muhitini shakllantirish kabi masalalarga e’tiborni kuchaytirish zururligi taklif etildi.
Ma’ruza yuzasidan bir qator ishtirokchilar so‘zga chiqdi. Ular o‘z chiqishlarida nomzod dasturida ilgari surilayotgan to‘g‘ridan-to‘g‘ri chet el investitsiyalarini jalb qilish orqali zamonaviy texnika va texnologiyalarga asoslangan ishlab chiqarishni tashkil etish, tijorat banklarining investitsiyaviy loyihalarini moliyalashtirishdagi ishtirokini yanada kengaytirish, xo‘jalik yurituvchi subyektlarni kreditlash tizimini soddalashtirish, makroiqtisodiy vaziyatdan kelib chiqib, foiz stavkalarini minimal darajada belgilash, muammoli qarzlar yuzaga kelishiga yo‘l qo‘ymaslik, bank xizmatlari sifatini yaxshilash orqali ularning investitsiyaviy faolligini kuchaytirish zarurligi to‘g‘risidagi fikrlarini qo‘llab-quvvatladi.
Shundan so‘ng savol-javoblarga navbat berildi. Unda saylovchilar o‘zlarini qiziqtirgan savollarga nomzod va uning ishonchli vakillaridan atroflicha javob olish imkoniga ega bo‘ldi.
Izoh (0)