Ўзбекистон Республикаси президентлигига Ўзбекистон ХДПдан кўрсатилган номзод Ҳотамжон Кетмонов 5 ноябрь, шанба куни Фарғона вилояти сайловчилари билан учрашди. Онлайн видеоконференция шаклида вилоятнинг барча туман ва шаҳарларидаги сайловчиларни қамраб олган тадбирни Ўзбекистон Республикаси Олий Мажлиси Қонунчилик палатаси депутати Абдуғаффор Қирғизбоев очди ва олиб борди. Бу ҳақда партия матбуот хизмати маълум қилди.
Номзоднинг ишончли вакили Дилбар Мамажанова сўз олиб, Ҳотамжон Кетмоновнинг таржимаи ҳоли билан йиғилганларни таништирди. Шундан сўнг сўз Ўзбекистон Республикаси Президентлигига номзодга берилди.
Ҳотамжон Кетмонов ўз маърузаси орқали сайловолди дастурининг асосий йўналишлари юзасидан йиғилганларга батафсил маълумот берди. Жумладан, дастур партиянинг мухолиф фракция сифатида илгари сурган қатор ғояларга асосланишини таъкидлаб, энг кам истеъмол харажатлари (истеъмол саватчаси) стандартларини белгилашнинг асосланган ва замонавий механизмларини ишлаб чиқиш ҳамда жорий қилиш, аҳолига коммунал хизматлар кўрсатиш тарифларининг давлат томонидан тартибга солинишини такомиллаштириш орқали коммунал хизматлар нархларини мақбуллаштириш, аҳоли бандлигини таъминлашнинг мутлақо янги ва замонавий усулларини жорий қилиш, иш ўринларини ташкил этиш дастурининг сўзсиз бажарилиши устидан парламент назоратини кучайтириш, барқарор иш ўринлари сони билан ўрта махсус ва олий таълим муассасалари битирувчиларини ишга жойлаштиришнинг ўзаро боғлиқлигини таъминлаш лозимлиги ҳақида тўхталди.
Номзод иқтисодий сиёсатдаги устувор вазифа давлатнинг молиявий-иқтисодий қудратини оширишни кучли ижтимоий сиёсат билан уйғунлаштириш орқали аҳоли, хусусан, унинг эҳтиёжманд қатламларининг турмуш даражасини янада яхшилашга йўналтиришдан иборат эканлиги, бунда эса «Иқтисодий ислоҳотларга ижтимоий самарадорлик!» шиорини илгари суришини таъкидлади.
Шунингдек, иқтисодий ислоҳотларни амалга оширишда бюджет маблағлари, айниқса, ижтимоий соҳага йўналтириладиган маблағларнинг мақсадли равишда сарфланиши устидан қатъий назоратни кучайтириш, давлатнинг ўсиб бораётган иқтисодий имкониятларидан аҳолининг барча қатламлари, энг аввало, кам таъминланган қатламининг турмуш даражасини яхшилашда фойдаланиш, замонавий техника ва технологиялардан фойдаланиш асосида хўжалик юритувчи субъектлар томонидан ишлаб чиқарилаётган товарлар ва хизматлар сифатини ошириш, таннархини пасайтириш, шунингдек, уларнинг экспорт имкониятларини кенгайтирувчи ва аҳолининг харид қобилиятини оширишга хизмат қилувчи рақобат муҳитини шакллантириш каби масалаларга эътиборни кучайтириш зурурлиги таклиф этилди.
Маъруза юзасидан бир қатор иштирокчилар сўзга чиқди. Улар ўз чиқишларида номзод дастурида илгари сурилаётган тўғридан-тўғри чет эл инвестицияларини жалб қилиш орқали замонавий техника ва технологияларга асосланган ишлаб чиқаришни ташкил этиш, тижорат банкларининг инвестициявий лойиҳаларини молиялаштиришдаги иштирокини янада кенгайтириш, хўжалик юритувчи субъектларни кредитлаш тизимини соддалаштириш, макроиқтисодий вазиятдан келиб чиқиб, фоиз ставкаларини минимал даражада белгилаш, муаммоли қарзлар юзага келишига йўл қўймаслик, банк хизматлари сифатини яхшилаш орқали уларнинг инвестициявий фаоллигини кучайтириш зарурлиги тўғрисидаги фикрларини қўллаб-қувватлади.
Шундан сўнг савол-жавобларга навбат берилди. Унда сайловчилар ўзларини қизиқтирган саволларга номзод ва унинг ишончли вакилларидан атрофлича жавоб олиш имконига эга бўлди.
Изоҳ (0)