O‘zbekistonning Jakartadagi elchixonasida bo‘lajak Prezident saylovlariga bag‘ishlangan davra suhbati bo‘lib o‘tdi. Unda Indoneziya ijtimoiy-siyosiy va ilmiy-akademik doiralari vakillari ishtirok etdi. Bu haqda “Jahon” axborot agentligi xabar bermoqda.
Davra suhbati qatnashchilari O‘zbekistonda saylovlarni tashkil etish bo‘yicha olib borilayotgan keng ko‘lamli ishlar, mazkur yo‘nalishda orttirilgan tajribani ijobiy baholadi.
— O‘zbekistondagi saylovlarda ikki bor kuzatuvchi sifatida ishtirok etganman. Indoneziya delegatsiyasi saylov uchastkalarida barcha sharoitlarning yaratilgani, saylov jarayoni yuksak darajada tashkil qilinganini e’tirof etgandi, — deya ta’kidladi mamlakat xalq vakillari palatasi a’zosi Mahfuz Siddiq.
— Toshkentda shu yil oktabrida bo‘lib o‘tgan xalqaro anjumanda ishtirok etib, milliy qonunchilikni takomillashtirish sohasidagi islohotlar bilan shaxsan tanishish imkoniyatiga ega bo‘ldim, — deydi Indoneziya Ombudsmen instituti raisi Amzulian Rifoiy. — Saylov sohasida to‘plangan tajriba va mustahkam huquqiy baza prezidentlik saylovlari muvaffaqiyatli o‘tishida asos bo‘lib xizmat qilishiga ishonchim komil.
Gunadarma universiteti rektori Eko Shri Margianti o‘z chiqishida bo‘lajak saylovlar O‘zbekiston huquq tizimini takomillashtirishda yana bir ulkan qadam bo‘lishiga umid bildirdi.
Izoh (0)