O‘zbekiston “Adolat” sotsial-demokratik partiyasidan O‘zbekiston Respublikasi Prezidentligiga nomzod Narimon Umarov 5-noyabr, shanba kuni Andijon viloyati saylovchilari bilan uchrashdi. Viloyatning barcha tuman va shaharlari saylovchilari bilan videokonferensiya orqali muloqot tarzida tashkil etilgan tadbirda jami 3000 nafarga yaqin talaba-yoshlar, jamoat tashkilotlari vakillari, fuqarolarning o‘zini o‘zi boshqarish organlari faollari, mahalliy kengashlar deputatlari, partiyaning viloyat, tuman va shahar kengashlari a’zolari qatnashdi. Bu haqda partiya matbuot xizmati xabar bermoqda.
Uchrashuvni O‘zbekiston “Adolat” SDP Andijon viloyat Kengashi raisi P. Asxanov olib bordi. Prezidentlikka nomzod N. Umarovning ishonchli vakili, O‘zbekiston “Adolat” SDP Andijon viloyat Kengashi matbuot kotibi A. Nazarov yig‘ilganlarga O‘zbekiston Respublikasi Prezidentligiga nomzodning tarjimai holi haqida batafsil ma’lumot berdi.
Narimon Umarov uchrashuv ishtirokchilariga o‘z saylovoldi dasturining asosiy yo‘nalishlarini ma’lum qildi. Xususan, nomzod demokratik ijtimoiy davlat va adolatli fuqarolik jamiyatini qurish, qonun ustuvorligiga erishish, makroiqtisodiy barqarorlikni yanada mustahamlash, fuqarolarning ijtimoiy himoyasini yanada kuchaytirish va bu boradagi ishlar samaradorligini oshirish, mamlakatni modernizatsiya qilishdek ustuvor vazifalardan kelib chiqqan holda, yangi avlod kadrlarini tayyorlash, milliy manfaatlar ustuvor bo‘lgan tashqi siyosatni olib borishga doir masalalarda o‘z qarashlari bilan o‘rtoqlashdi.
Nomzod saylovchilar e’tiborini Andijon viloyati respublikaning maydoni eng kichik va aholi zich yashaydigan hududi ekanligiga qaratar ekan, viloyatda bugungi kunda 2,9 milliondan ortiq kishi istiqomat qilayotgani hamda shunday sharoitda viloyat aholisining uy-joyga bo‘lgan talab va ehtiyoji yuqoriligi haqida to‘xtaldi.
N. Umarov mamlakat aholisi soni ko‘payib, ularning turmush sifati va darajasi yuksalib borayotganidan kelib chiqib, fuqarolarning uy-joyga bo‘lgan talabini qondirishning maqbul yo‘llarini taklif etdi. Uy-joy sotib olish va qurish uchun ajratilayotgan ipoteka kreditlash jarayonini takomillashtirish va foizlarini optimallashtirish, uy-joy bozoridagi firibgarliklar uchun javobgarlikni va nazoratni kuchaytirish, uy-joy-kommunal kompleksi ishini yanada yaxshilash, aholi uchun belgilanayotgan kommunal to‘lovlar miqdorini doimiy nazoratda tutish, bu sohalarda aholiga xizmat ko‘rsatadigan muqobil tashkilotlar o‘rtasidagi raqobatni oshirishga qaratilgan sa’y-harakatlarni amalga oshirish ustuvor maqsadlaridan biri ekanligini ma’lum qildi.
Ochiq va jonli muloqot ruhida o‘tgan uchrashuvda ishtirokchilar Prezidentlikka nomzodga o‘zlarini qiziqtirgan savollar bilan murojaat etdi hamda hududlarni ijtimoiy-iqtisodiy rivojlantirish bo‘yicha o‘z fikr va takliflarini bildirdi.
Andijon viloyat xalq deputatlari viloyat Kengashi deputati Z. Komilova, Asaka tuman tibbiyot birlashmasi ko‘p tarmoqli markaziy poliklinika shifokori A. Sultonov, “ASR Farovonlik sari” mas’uliyati cheklangan jamiyati rahbari B. Komilov, O‘zbekiston “Adolat” SDP Asaka tuman kengashi raisi M. Karimova va boshqalar Narimon Umarovning saylovoldi dasturini qo‘llab-quvvatlab so‘zga chiqdi hamda saylovchilarni 4-dekabr kuni bo‘lib o‘tadigan muhim siyosiy tadbirda faol ishtirok etishga chaqirdi.
Izoh (0)