O‘zbekiston Respublikasi Prezidentligiga O‘zbekiston “Milliy tiklanish” demokratik partiyasidan nomzod Sarvar Otamuratovning Namangan viloyatidagi saylovchilar va keng jamoatchilik bilan uchrashuvi bo‘lib o‘tdi. Uchrashuv viloyatning barcha tuman va shaharlaridagi saylovchilar bilan onlayn videokonferensiya orqali muloqot tarzida tashkil etildi. Bu haqda “Daryo”ga partiya viloyat kengashi matbuot xizmati ma’lum qildi.
Nomzodning Namangan viloyatidagi ishonchli vakili Odiljon Mamadaliyev ishtirokchilarga Sarvar Otamuratovni tanishtirar ekan, uning tarjimai holiga batafsil to‘xtalib o‘tdi. Shundan so‘ng O‘zbekiston Respublikasi Prezidentligiga nomzod Sarvar Otamuratov saylovoldi Dasturi yuzasidan nutq so‘zladi.
Nomzod ta’kidlaganidek, saylovoldi dasturida xalqaro miqyosda e’tirof etilgan islohotlar bardavomligini ta’minlash, tarixiy, madaniy, boy ma’naviy-axloqiy qadriyatlar va an’analar asosida jamiyatda yuksak huquqiy va siyosiy madaniyatni mustahkamlash hamda ma’naviy yuksalishga erishish masalalariga ustuvor ahamiyat qaratilgan. Madaniy yodgorliklar umumjahon ahamiyatiga molik ekanligi e’tirof etilib, shaharlarning milliy qiyofasini saqlab qolishda samarali chora-tadbirlarni amalga oshirish, arxitektura yodgorliklarini asrab-avaylash, qayta ta’mirlashga ko‘maklashish asosiy vazifa ekanligi qayd etilgan.
Namangan viloyatida 118 ta kasb-hunar kolleji va akademik litsey mavjud bo‘lib, ularning qariyb 70 foizi qishloq joylarida joylashgan. Boshqacha aytganda, bugungi kunda o‘rta-maxsus kasb-hunar ta’limi muassasalarida tahsil olayotgan o‘quvchilarning 70 ming nafarga yaqinini chekka qishloqlarda yashovchi o‘g‘il-qizlar tashkil etadi. Shu nuqtai nazardan, dasturda olis va yetib borish qiyin bo‘lgan joylardagi kasb-hunar kollejlari va akademik litsey o‘quvchilari uchun imtiyozli transport qatnovini ta’minlash vazifasi ilgari surilgan.
Shuningdek, dasturda xorijiy mamlakatlar kutubxona, arxiv va muzeylarida saqlanayotgan moddiy boyliklarni O‘zbekistonga qaytarish, oila, meros, uy-joy da’vosi va maishiy turmush manbaida tug‘iladigan nizolarni sudgacha hal etish tizimini rivojlantirish, turistik faoliyat manzillarida, xalqaro aeroportlarda, vokzallarda ko‘rsatilayotgan servis va xizmatlar sifatini yaxshilash, oziq-ovqat xavfsizligini ta’minlashga qaratilgan davlat dasturini qabul qilish, milliy axborot xavfsizligini ta’minlash kabi bir qator ustuvor vazifalar belgilangan.
Nomzodning saylovoldi dasturi uchrashuv ishtirokchilarida katta qiziqish uyg‘otdi. Uni qo‘llab-quvvatlab, Namangan tumani “Salomatlik markazi” direktori Salomatxon Arzimatova, Namangan shahar transport va axborot texnologiyalari kasb-hunar kolleji o‘qituvchisi Yulduz Rahimova va boshqalar so‘zga chiqdi.
Uchrashuv so‘ngida S. Otamuratov ishtirokchilarning bir qator savollariga javob berdi.
Izoh (0)