Xiaomi kompaniyasi oktabr oxirida taqdim etgan Xiaomi MIX smartfoni bilan bog‘liq ilk muammolar ma’lum qilindi, deb yozadi “Hi-tech.mail.ru”. Qurilmaning romsiz ekrani o‘ta zaif va tez sinadigan bo‘lib chiqdi.
Xiaomi MIX cheklangan nusxada chiqariladi va kamida 520 dollardan sotiladi. My Drivers manbasi smartfonning tashqi ko‘rinishi chiroyli bo‘lsa-da, u birinchi qulashidayoq ekrani shikastlanishi haqida ogohlantirdi.
Qurilma yerga tushib ketganidan so‘ng, ekrani ishdan chiqishi mumkin. Shishaning qayrilgan cheti smartfonning yuqori qirrasiga kirgan. Agar Xiaomi MIX tepa qirrasi bilan yerga tushsa, qurilma shu zahoti yoriqlar bilan qoplanadi.
Shuningdek, smartfonning sopoldan ishlangan orqa paneli o‘ta silliqligidan uni tushirib qo‘yish oson ekanligi ta’kidlandi va qurilmani g‘ilofga solish tavsiya etildi.
Izoh (0)