Facebook aksiyalarining qiymati qariyb 8 foizga tushib ketdi

AQSh fond birjasi yopilgach, Facebook ijtimoiy tarmog‘i aksiyalari qiymati 7,85 foizga — 117,19 dollargacha (bitta qimmatli qog‘oz uchun) pasaydi, deb yozadi “Korrespondent.net”.

Ta’kidlanishicha, aksiyalar arzonlashishi kompaniyaning reklamadan oladigan daromadi o‘sishining sekinlashishi ehtimoli haqida ma’lumot paydo bo‘lishi hamda kompaniya hisoboti e’lon qilinishi fonida kuzatildi.

Ijtimoiy tarmoq moliyaviy direktori Devid Vener reklamadan keladigan tushumning o‘sishi reklama hajmining cheklanishi tufayli sekinlashishini aytdi.

Shuningdek, kompaniya kelasi yilda katta hajmli investitsiyalarni rejalashtirmoqda, bu esa xarajatlar keskin oshishiga olib keladi.