Janubiy Hindistonda yuzlab yo‘lovchi ketayotgan yo‘lovchi poyezdi temiryo‘l ma’muriyatining mahalliy dehqondan qarzi borligi sabab, sud qaroriga muvofiq, musodara qilindi. Bu haqda “TASS” xabar bermoqda.
Times of India gazetasi xabariga ko‘ra, mahalliy temiryo‘l ma’muriyati qarzdorlikni to‘lab berish bilan bog‘liq masalani hal qilgunicha, poyezd qariyb ikki soat davomida musodara qilingan, deb hisoblangan va stansiyada to‘xtab turgan.
Karnataka shtatida “Dharvad — Bangalor” yo‘nalishi bo‘ylab harakatlanayotgan poyezd Xarixar stansiyasida politsiyachilar hamrohligidagi sud ijrochilari tomonidan qo‘lga olingan.
Poyezd brigadasiga ko‘p yillik qarz (taxminan 57 ming dollar) hali ham to‘lanmagani sabab, harakatlanuvchi tarkib to‘lig‘icha musodara etilishi ma’lum qilingan.
Ma’lum bo‘lishicha, mazkur departament Xarixardan Kotturuga temiryo‘l bo‘lagini qurish maqsadida 1991-yili 300 ga yaqin mahalliy fermerdan yer olgan, biroq hamma ham yeri uchun pul ololmagan — 100 ga yaqin dehqon kompensatsiya pulisiz qolgan.
Holat yuzasidan bildirilgan ko‘plab shikoyatlar natija bermagan, biroq Shivakumar ismli dehqon oxirigacha harakat qilgan va ko‘p yillar davomida turli darajadagi sud instansiyalariga murojaatlar yo‘llagan.
Oxiri mahalliy magistratning bosh sudyasi qarzdorlik uchun temiryo‘lning mulkini musodara qilish haqida qaror chiqargan.
Hayratda qolgan yo‘lovchilarga poyezd yo‘lda davom etmasligi, yo‘lovchilar o‘z manziliga o‘zi yetib olishi lozimligi aytilgan. Oradan ikki soat o‘tib mahalliy temiryo‘l boshlig‘i departamentda hozircha buncha pul yo‘qligini ma’lum qilib, qarzdorlik bir hafta ichida yopilishiga va’da bergan va o‘z va’dasini kafolat xati bilan tasdiqlagan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)