AQShda umrini saqlab qolish maqsadida homiladorlikning 12-haftasida onasining qornidan chiqarib olingan qizaloq dunyoga keldi, deya xabar bermoqda “Vesti.ru”.
Homiladorlikning boshlang‘ich davridagi ultratovush tekshiruvi vaqtida shifokorlar embrion tanasida shish borligini aniqladi. Bunday shish 50 foiz holatda hali tug‘ilmagan chaqaloqning qon aylanishini buzadi va uning o‘limiga sabab bo‘ladi.
Shifokorlar va qizaloqning ota-onasi zudlik bilan qaror qabul qilishi lozim edi — yo homiladorlikni to‘xtatish, yoki bo‘lmasa embrionni onaning tanasidan chiqarib olishdek tavakkalchilikka qo‘l urish kerak bo‘lardi.
Qizning ota va onasi operatsiyani tanladi. Jarrohlik amaliyoti besh soat davom etdi: shifokorlar embrionni ona qornidan chiqarib, shishni olib tashladi va keyin embrionni yana ona qorniga joylashtirdi.
Qiz sog‘lom tug‘ildi. Shunga qaramay, tug‘ilganidan bir necha kun o‘tib shifokorlar shishning qoldig‘ini olib tashlash uchun uni yana operatsiya qilishga majbur bo‘ldi. Hozirda qiz to‘la tiklanib bo‘lgan va uning salomatligiga hech qanday xavf yo‘q.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’”ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)