Futbol bo‘yicha O‘zbekiston milliy terma jamoasi bosh murabbiyi Samvel Babayan “Chempionat” nashriga bergan intervyusida Rossiyaning “Orenburg” klubida to‘p surayotgan o‘zbekistonlik futbolchi Vadim Afoninning terma jamoaga chaqirishga tayyor ekanini ma’lum qildi.
– “Orenburg” safida O‘zbekiston pasportiga ega bo‘lgan Vadim Afonin to‘p suradi. Uning jamoada o‘ziga yarasha o‘rni bor. Lekin u O‘zbekiston termasi tarkibida yo‘q. Sababi nimada?
– Afonin atrofida uning fuqaroligi borasida turli gap-so‘zlar kelib chiqmoqda. Shuning uchun, vaziyatni oydinlashtirsam. Men Vadim bilan gaplashdim, uni mamnuniyat bilan terma jamoaga jalb qilishimni aytdim, u ham bunga javoban rozilik bildirdi. Biroq hozir uning pasporti bilan bog‘liq tashkiliy masalalar bunga xalal bermoqda.
Yaqin vaqt ichida Afoninning pasporti yuridik kuchga ega yoki yo‘qlini ma’lum bo‘ladi. Agar pasport yuridik kuchga ega bo‘lsa, uni bo‘lajak o‘yinga chaqiraman. Albatta, bunday darajadagi futbolchi bizga yordam bera olardi va u termaga chaqirilishga haqli. O‘zbekiston futbol federatsiyasidagi mutaxassislar bu masala yechimi ustida ish olib bormoqda.
Avvalroq Vadim Afonin O‘zbekiston terma jamoasi safida to‘p surishga tayyor ekanini bildirgan edi. Afonin 2012-yilda O‘zbekiston termasi safida bir marta o‘rtoqlik o‘yinida maydonga tushgan.
Izoh (0)