Bojxona chegaralari orqali jismoniy shaxslar tomonidan noutbuk, qo‘l telefoni va boshqa axborot tashuvchi vositalarda behayolikni targ‘ib etuvchi materiallarni olib o‘tishga bo‘lgan urinishlar tez-tez uchramoqda, deb yozadi O‘zbekiston Respublikasi Davlat bojxona qo‘mitasi axborot xizmati.
Respublika bojxonachilari tomonidan bu turdagi bojxona qoidabuzarliklarining oldini olishga qaratilgan chora-tadbirlar davom ettirilmoqda.
Samarqand xalqaro aeroportida Sankt-Peterburgdan uchib kelgan fuqaro O.Tillayevning (maqoladagi barcha ism-shariflar o‘zgartirilgan) qo‘l telefoni ko‘zdan kechirilganda, 72 dona behayo mazmundagi foto va video material borligi aniqlandi.
Xorijdan yangiyo‘llik V.Olga nomiga yuborilgan pochta jo‘natmasi Toshkent shahar bojxona boshqarmasi “Boshpochtamt” tashqi iqtisodiy faoliyat bojxona posti xodimlari tomonidan bojxona ko‘rigidan o‘tkazilganda, mazkur jo‘natmada behayolikni targ‘ib etuvchi 3 dona kitoblar yuborilganligi aniqlandi.
Chelyabinsk—Toshkent reysi bo‘yicha poyezdda kirib kelgan yo‘lovchi, farg‘onalik B.Ahrorov noutbukiga 370 donadan ortiq behayo fotosuratlarni jamlagan.
Toshkent viloyati bojxona boshqarmasi xodimlari tomonidan ham pornografik hamda zo‘ravonlikni yoki shafqatsizlikni targ‘ib qiluvchi mahsulotlarning respublikaga olib kirilishiga qarshi chora-tadbirlar olib borilmoqda.
Jumladan, “G‘ishtko‘prik” bojxona kompleksi orqali qo‘shni davlatdan kirib kelgan fuqaro O.Tursunov uyali aloqa vositasi xotirasida 104 dona behayo mazmundagi video faylni olib kirishga uringan paytda to‘xtatib qolindi.
Buxoro aeroportida Moskvadan uchib kelgan A.Jumayevning qo‘l yuklari bojxona ko‘rigidan o‘tkazilganda, unga tegishli qo‘l telefoni xotirasiga 173 dona behayo mazmundagi videolavha joylashtirganligi aniqlandi.
Hozirda mazkur holatlar yuzasidan bojxona tekshiruvlari va surishtiruv harakatlari davom ettirilmoqda.
Izoh (0)