Божхона чегаралари орқали жисмоний шахслар томонидан ноутбук, қўл телефони ва бошқа ахборот ташувчи воситаларда беҳаёликни тарғиб этувчи материалларни олиб ўтишга бўлган уринишлар тез-тез учрамоқда, деб ёзади Ўзбекистон Республикаси Давлат божхона қўмитаси ахборот хизмати.
Республика божхоначилари томонидан бу турдаги божхона қоидабузарликларининг олдини олишга қаратилган чора-тадбирлар давом эттирилмоқда.
Самарқанд халқаро аэропортида Санкт-Петербургдан учиб келган фуқаро О.Тиллаевнинг (мақоладаги барча исм-шарифлар ўзгартирилган) қўл телефони кўздан кечирилганда, 72 дона беҳаё мазмундаги фото ва видео материал борлиги аниқланди.
Хориждан янгийўллик В.Ольга номига юборилган почта жўнатмаси Тошкент шаҳар божхона бошқармаси «Бошпочтамт» ташқи иқтисодий фаолият божхона пости ходимлари томонидан божхона кўригидан ўтказилганда, мазкур жўнатмада беҳаёликни тарғиб этувчи 3 дона китоблар юборилганлиги аниқланди.
Челябинск—Тошкент рейси бўйича поездда кириб келган йўловчи, фарғоналик Б.Аҳроров ноутбукига 370 донадан ортиқ беҳаё фотосуратларни жамлаган.
Тошкент вилояти божхона бошқармаси ходимлари томонидан ҳам порнографик ҳамда зўравонликни ёки шафқатсизликни тарғиб қилувчи маҳсулотларнинг республикага олиб кирилишига қарши чора-тадбирлар олиб борилмоқда.
Жумладан, «Ғишткўприк» божхона комплекси орқали қўшни давлатдан кириб келган фуқаро О.Турсунов уяли алоқа воситаси хотирасида 104 дона беҳаё мазмундаги видео файлни олиб киришга уринган пайтда тўхтатиб қолинди.
Бухоро аэропортида Москвадан учиб келган А.Жумаевнинг қўл юклари божхона кўригидан ўтказилганда, унга тегишли қўл телефони хотирасига 173 дона беҳаё мазмундаги видеолавҳа жойлаштирганлиги аниқланди.
Ҳозирда мазкур ҳолатлар юзасидан божхона текширувлари ва суриштирув ҳаракатлари давом эттирилмоқда.
Изоҳ (0)