Yemelyanenkoning 9 yoshli qiziga hujum qilindi

Moskvada taniqli jangchi Fyodor Yemelyanenkoning qiziga hujum qilindi. Buning oqibatida u shifoxonaga tushib qoldi, deb xabar beradi “Gazeta.ru”.

Voqea o‘tgan hafta oxirida yuz berdi. Hujum sportchining ikkinchi turmushidan bo‘lgan o‘rtancha qiziga uyushtirildi. 9 yoshli qizning ko‘kragiga kutilmaganda zarba berildi. Jinoyatchilar jarohat ko‘rinmasligini, lekin shu paytning o‘zida qizning yuragiga zarar yetishini ko‘zlagan deb taxmin qilinmoqda.

Qiz o‘z oyoqlarida uygacha yetib bordi. Boshida u onasiga hech narsani aytib bermadi. Ammo birozdan so‘ng og‘riqlardan azob cheka boshladi. Dam olish kunlari esa qiz yotib qoldi, shunda onasi uni shifokorga ko‘rsatdi.

Qizning ko‘krak qafasi va qorin bo‘shlig‘iga zarar yetgani aniqlandi.

Eslatib o‘tamiz, Fyodor Yemelyanenko 4-oktabr kuni Grozniy shahrida o‘tkazilgan Grand Prix Akhmat 2016 aralash janglar turnirida yosh bolalar ishtirokini tanqid qilgandi.

Keyinroq “Axmat” klubi prezidenti Abuzayd Vismuradov Rossiya MMA rahbarining ushbu masala yuzasidan tanqid qilishga haqqi yo‘q ekanini aytgandi.

Shuningdek, Checheniston rahbari Ramzan Qodirov Yemelyanenkoning tanqidiga o‘z munosabatini bildirgan edi.