Tojmahalga avvalgi tarovatini qaytarish maqsadida maqbara uch yil davomida oq gil bilan tozalanadi. Bu haqda Hindiston arxeologiya xizmati (ASI) vakillari ma’lum qildi, deb xabar beradi “TASS”.
“Noqulay ekologik vaziyat va kechalari maqbara devorlari, gumbazini qoplaydigan hasharotlar ayni ma’noda o‘zining qora ishini qildi. Biz Tojmahalning marmar yuzasi ifloslanishini o‘rganib, oxirgi yillarda paydo bo‘lgan kulrang-sariq tus 55 foiz chang, 35 foiz kulrang uglerod va 10 foiz qurumdan iborat qatlam tufayli yuzaga kelganini aniqladik. Obidaga ziyon yetkazmay mazkur qatlamni tozalashda hind go‘zallari asrlar mobaynida yuzini tiniqlashtirish uchun ishlatib kelgan oq gildan iborat ‘Multani mitti’ niqobi bizga yordam beradi”, — ta’kidladi ASI kimyoviy bo‘linmasi rahbari Kumar Bxatangar.
Ekspertga ko‘ra, sayyohlarni dunyo me’morchiligi durdonasidan bahra olish imkoniyatidan mahrum etmaslik uchun oq gil maqbaraga bir necha bosqichda surtiladi va bu jarayon uch yil davom etadi. Unga tayyorgarlik allaqachon boshlab yuborilgan: Tojmahal gumbazi atrofi va minoralarda uning ko‘rinishini salkam bir yilga to‘sadigan qurilish havozalari o‘rnatildi.
ASI mehmonlar buni to‘g‘ri tushunishiga umid qilmoqda, zero bunday tozalash tadbirlari oldin ham uch marotaba — 1994, 2001 va 2008-yillarda o‘tkazilgan.
Izoh (0)