Shimoliy Koreya yadro qurolini birinchi bo‘lib qo‘llamasligini tasdiqladi

Pxenyan hech qachon birinchi bo‘lib yadro qurolini qo‘llamaydi. Bu haqda KXDR vakili BMT Bosh assambleyasi birinchi qo‘mitasi sessiyasida ma’lum qildi, deya xabar beradi “TASS”.

“Mamlakatimiz Qo‘shma Shtatlar tomonidan tahdidlar tufayli o‘zini himoya qilish maqsadida yadro quroliga ega bo‘ldi va suvereniteti buzilmasa, uni hech qachon birinchi bo‘lib qo‘llamaydi. AQSh aybi bilan Koreya yarim oroli real urush xavfiga duch kelmoqda. Shu sababli KXDR bundan keyin ham o‘zining Amerika tahdidlariga qarshi turish va shimoli-sharqiy Osiyo hamda butun dunyoda xavfsizlikni ta’minlashga imkon beruvchi qudratli, tiyib turuvchi yadro aslahalariga tayanishda davom etadi”, — deya ta’kidladi Shimoliy Koreya vakili.

KXDR vakili BMT Xavfsizlik kengashini Pxenyan tomonidan amalga oshirilgan yadro sinovlari va raketa uchirishlari qoralangan “asoslanmagan bayonot va rezolyutsiyalar” uchun tanqid qildi. Unga ko‘ra, kengashning bunday harakatlari BMT Ustaviga zid hisoblanadi.