Тожмаҳалга аввалги тароватини қайтариш мақсадида мақбара уч йил давомида оқ гил билан тозаланади. Бу ҳақда Ҳиндистон археология хизмати (ASI) вакиллари маълум қилди, деб хабар беради «ТАСС».
«Ноқулай экологик вазият ва кечалари мақбара деворлари, гумбазини қоплайдиган ҳашаротлар айни маънода ўзининг қора ишини қилди. Биз Тожмаҳалнинг мармар юзаси ифлосланишини ўрганиб, охирги йилларда пайдо бўлган кулранг-сариқ тус 55 фоиз чанг, 35 фоиз кулранг углерод ва 10 фоиз қурумдан иборат қатлам туфайли юзага келганини аниқладик. Обидага зиён етказмай мазкур қатламни тозалашда ҳинд гўзаллари асрлар мобайнида юзини тиниқлаштириш учун ишлатиб келган оқ гилдан иборат ‘Мультани митти’ ниқоби бизга ёрдам беради», — таъкидлади ASI кимёвий бўлинмаси раҳбари Кумар Бхатангар.
Экспертга кўра, сайёҳларни дунё меъморчилиги дурдонасидан баҳра олиш имкониятидан маҳрум этмаслик учун оқ гил мақбарага бир неча босқичда суртилади ва бу жараён уч йил давом этади. Унга тайёргарлик аллақачон бошлаб юборилган: Тожмаҳал гумбази атрофи ва минораларда унинг кўринишини салкам бир йилга тўсадиган қурилиш ҳавозалари ўрнатилди.
ASI меҳмонлар буни тўғри тушунишига умид қилмоқда, зеро бундай тозалаш тадбирлари олдин ҳам уч маротаба — 1994, 2001 ва 2008 йилларда ўтказилган.
Изоҳ (0)