Shimoliy Koreya 12 yil avval yo‘qolgan amerikalik talaba mamlakatda saqlanayotgani haqidagi ma’lumotlarni rad etdi

KXDR TIV vakili amerikalik talabaning Shimoliy Koreya tomonidan o‘g‘irlangani haqidagi ma’lumotlarni bo‘hton deb atadi. Bu haqda “TASS” xabar bermoqda.

“Devid Sneddon 12 yil avval Xitoyda, tog‘ sayri chog‘ida yo‘qolgan va uning oilasi hamda Davlat departamenti bu haqda xabardor qilingan. Biz mazkur hodisaga qandaydir aloqamiz borligini butunlay rad etamiz”, — ta’kidladi diplomat.

Oldinroq AQShda faoliyat ko‘rsatadigan “O‘g‘irlanganlarning oila a’zolari uyushmasi” guruhi Xitoyda yo‘qolgan talaba go‘yoki KXDRga yetkazilganini da’vo qilgandi. AQSh matbuotida ham “Shimoliy Koreya qamoqxonalarida hibsda saqlanayotgan yuzlab yo‘qolgan amerikaliklar” haqidagi ma’lumotlar paydo bo‘ldi.

Xitoy manbalariga ko‘ra, 24 yoshli Devid Sneddon 2004-yili Yunnan provinsiyasida yo‘qolgan. Mahalliy politsiyaning taxminicha, Yuta shtatidagi universitetlardan birining talabasi daryoga cho‘kib ketgan.