Parij janubidagi Viri-Shatiyon shahri, Grand Born tumanida jinoyatchilar kuzatuv kamerasini qo‘riqlayotgan ikki politsiyachini tiriklayin yoqib yuborishga harakat qildi. Ular politsiya mashinasiga alangalanuvchi yoqilg‘i solingan shisha idishni uloqtirdi, politsiyachilar esa og‘ir jarohatlar bilan kasalxonaga yetkazildi. Bu haqda “TASS” xabar bermoqda.
“Shaharning asosiy chorrahalaridan birida o‘rnatilgan kamera oldinlari bir necha bor jinoyatchilar xurujiga duch kelgan. Bu aynan shu yerda banditlar svetofor oldida to‘xtagan haydovchilarga hujum qilib, talonchilik qilgani yoki kalitini olib qo‘yib, avtomobilini olib qochgani bilan bog‘liq”, — ma’lum qildi Fransiya politsiya xodimlari kasaba uyushmasi vakili Nikolya Kont.
BFM-TV telekanaliga ko‘ra, politsiya patrul mashinasi chorrahada oldingisi yo‘q qilinganidan so‘ng doimiy ravishda kamerani qo‘riqlayotgandi. Taxminan 15 kishidan iborat jinoyatchilar hujum uyushtirganda politsiyachilar ko‘mak so‘rashga ulgurdi, biroq ikkinchi mashina ham yoqib yuborildi, undagi ikki politsiyachi esa yengil yaralandi.
Hozirda shaharga huquq-tartibot idoralarining ko‘p sonli kuchlari tashlandi. Biroq hujum qilganlardan hech birini aniqlash va qo‘lga olishga muvaffaq bo‘linmadi.
Izoh (0)