O‘zbekiston milliy terma jamoasi JCh—2018 3-saralash bosqichidagi birinchi mag‘lubiyatini Eronga qarshi o‘yinda qabul qilib oldi.
Toshkentdagi “Bunyodkor” stadionida Eron milliy terma jamoasini qabul qilgan o‘zbekistonliklar 26-daqiqada o‘z darvozasidan gol o‘tkazib yubordi. Bu gol o‘yin yakuniga qadar yagona bo‘lib qoldi.
Bellashuvda Odil Ahmedov jarohati sabab ishtirok etmadi. Uning o‘rnida jamoani sardor sifatida maydonga boshlab tushgan Server Jeparov 38-daqiqada jarohat olib, maydonni tark etdi.
Shundan keyin o‘zbekistonliklar sardori bo‘lgan Aleksandr Geynrix esa 57-daqiqada sariq kartochka olib, 11-oktabr kuni Xitoyga qarshi bo‘lib o‘tadigan o‘yinni qo‘yib yuboradigan bo‘ldi. Ismi Sardor bo‘lgan Rashidov esa milliy terma jamoadagi ketma-ket uchinchi rasmiy o‘yinda gol ura olmadi. U Qatar Yulduzlar Ligasining yangi mavsumini ketma-ket gollar bilan boshlagandi.
Aleksandr Geynrixdan tashqari himoyachi Anzur Ismoilov ham Xitoyga qarshi o‘yinda ishtirok eta olmaydi. U 66-daqiqada avstraliyalik hakam Benjamin Jon Uilyams tomonidan ogohlantirildi.
Eron terma jamoasi bunga qadar Toshkentga uch marta tashrif buyurgan bo‘lib, shularning 2 tasida zafar quchgan va o‘z darvozasidan birorta gol o‘tkazib yubormagandi. Bu an’ana 6-oktabr kunidagi o‘yinda ham davom etdi.
Mazkur g‘alaba Karlush Keyrush boshqaruvidagi Eronni guruhda 1-o‘ringa olib chiqdi. Xuddi uning kabi 7 ochkosi bor bo‘lgan Janubiy Koreya ikkinchi bo‘lib turibdi. Saralashni ketma-ket ikki g‘alaba bilan boshlagan O‘zbekiston uchinchi jamoaga aylangan.
Ma’lumot uchun, Samvel Babayan terma jamoani qabul qilib olganidan so‘ng ketma-ket 9 rasmiy o‘yinda zafar quchgandi. Eronga qarshi bellashuvda esa uning birinchi mag‘lubiyati qayd etildi.
Forslarga qarshi o‘yin O‘zbekiston termasining vitse-sardori Server Jeparov uchun bosh jamoadagi 119-uchrashuv bo‘ldi. Jeparov bu borada eng ko‘p o‘yin o‘tkazgan Timur Kapadzega yetib oldi.
JCh—2018 3-saralash. 3-tur 6-oktabr, payshanba
O‘zbekiston — Eron 0:1
Gol: Jalol Xusayniy, 26 (0:1).O‘zbekiston: Aleksandr Lobanov — Yegor Krimets, Anzur Ismoilov, Azizbek Haydarov, Server Jeparov (Aleksandr Geynrix, 38), Sardor Rashidov (Jaloliddin Masharipov, 62), Igor Sergeyev (Marat Bikmayev, 72), Otabek Shukurov, Vitaliy Denisov, Islom To‘xtaxo‘jayev, Eldor Shomurodov.
Eron: Alirizo Beiranvand — Ehson Xojsafiy, Jalol Xusayniy, Milad Muhammadiy, Said Izzatullohiy, Mas’ud Shojaiy (Andranik Temuriyon, 84), Murtazo Puraliganji, Vohid Amiriy, Rizo G‘uchannajod (Sardor Azmun, 63), Mehdi Taremiy (Alirizo Jahonbahsh, 75), Ramin Rizoian.
Izoh (0)