ЖЧ—2018. Ўзбекистонни мағлуб этган Эрон Самвел Бабаяннинг 9 ўйинлик мағлубиятсиз сериясига якун ясади

Ўзбекистон миллий терма жамоаси ЖЧ—2018 3-саралаш босқичидаги биринчи мағлубиятини Эронга қарши ўйинда қабул қилиб олди.

Тошкентдаги «Бунёдкор» стадионида Эрон миллий терма жамоасини қабул қилган ўзбекистонликлар 26-дақиқада ўз дарвозасидан гол ўтказиб юборди. Бу гол ўйин якунига қадар ягона бўлиб қолди.

Беллашувда Одил Аҳмедов жароҳати сабаб иштирок этмади. Унинг ўрнида жамоани сардор сифатида майдонга бошлаб тушган Сервер Жепаров 38-дақиқада жароҳат олиб, майдонни тарк этди.

Шундан кейин ўзбекистонликлар сардори бўлган Александр Гейнрих эса 57-дақиқада сариқ карточка олиб, 11 октябрь куни Хитойга қарши бўлиб ўтадиган ўйинни қўйиб юборадиган бўлди. Исми Сардор бўлган Рашидов эса миллий терма жамоадаги кетма-кет учинчи расмий ўйинда гол ура олмади. У Қатар Юлдузлар Лигасининг янги мавсумини кетма-кет голлар билан бошлаганди.

Александр Гейнрихдан ташқари ҳимоячи Анзур Исмоилов ҳам Хитойга қарши ўйинда иштирок эта олмайди. У 66-дақиқада австралиялик ҳакам Бенжамин Жон Уильямс томонидан огоҳлантирилди.

Эрон терма жамоаси бунга қадар Тошкентга уч марта ташриф буюрган бўлиб, шуларнинг 2 тасида зафар қучган ва ўз дарвозасидан бирорта гол ўтказиб юбормаганди. Бу анъана 6 октябрь кунидаги ўйинда ҳам давом этди.

Мазкур ғалаба Карлуш Кейруш бошқарувидаги Эронни гуруҳда 1-ўринга олиб чиқди. Худди унинг каби 7 очкоси бор бўлган Жанубий Корея иккинчи бўлиб турибди. Саралашни кетма-кет икки ғалаба билан бошлаган Ўзбекистон учинчи жамоага айланган.

Маълумот учун, Самвел Бабаян терма жамоани қабул қилиб олганидан сўнг кетма-кет 9 расмий ўйинда зафар қучганди. Эронга қарши беллашувда эса унинг биринчи мағлубияти қайд этилди.

Форсларга қарши ўйин Ўзбекистон термасининг вице-сардори Сервер Жепаров учун бош жамоадаги 119-учрашув бўлди. Жепаров бу борада энг кўп ўйин ўтказган Тимур Кападзега етиб олди.

ЖЧ—2018 3-саралаш. 3-тур 6 октябрь, пайшанба

Ўзбекистон — Эрон 0:1

Ўзбекистон: Александр Лобанов — Егор Кримец, Анзур Исмоилов, Азизбек Ҳайдаров, Сервер Жепаров (Александр Гейнрих, 38), Сардор Рашидов (Жалолиддин Машарипов, 62), Игорь Сергеев (Марат Бикмаев, 72), Отабек Шукуров, Виталий Денисов, Ислом Тўхтахўжаев, Элдор Шомуродов.

Эрон: Алиризо Беиранванд — Эҳсон Хожсафий, Жалол Хусайний, Милад Муҳаммадий, Саид Иззатуллоҳий, Масъуд Шожаий (Андраник Темуриён, 84), Муртазо Пуралиганжи, Воҳид Амирий, Ризо Ғучаннажод (Сардор Азмун, 63), Меҳди Таремий (Алиризо Жаҳонбаҳш, 75), Рамин Ризоиан.