Elliott Management’ga tegishli Blake Capital va Potter Capital investitsiya fondlari Samsung Electronics kompaniyasini biznesni ikkita alohida kompaniyaga bo‘lishga chaqirdi. Bu haqda Financial Times xabar berdi, deb yozadi “Interfaks”. Samsung’ning jami 0,62 foiz aksiyalariga egalik qiluvchi fondlar, shuningdek, kompaniyani aksiyadorlarga dividend to‘lash va Nasdaq birjasida listingga ega bo‘lish uchun 30 trillion Koreya voni (27 milliard dollar) yo‘naltirishga da’vat etmoqda.
Aksiyadorlar kompaniyaga yo‘llagan maktubda ta’kidlanishicha, Samsung Electronics a’lo darajali aktivlar portfelini yaratib, kuchli natijalarga erishdi. Shunga qaramay, Samsung aksiyadorlari uzoq vaqtdan buyon biznesning fond bozorida yetarlicha baholanmasligidan azob chekib kelmoqda.
Aksiyadorlar fikriga ko‘ra, juda murakkab boshqaruv tuzilmasiga ega kompaniya aksiyasi taxminan 70 foizga yetarlicha baholanmagan. Kompaniya aksiyalari 2015-yilda 45 foizga qimmatlashdi, joriy yil avgusti oxirida ularning narxi rekord darajagacha ko‘tarikib ketdi, ayni paytda esa ushbu ko‘rsatkich rekord darajadan buyon bor-yo‘g‘i 4 foizga pasaygan, xolos.
Izoh (0)