O‘zbekiston milliy terma jamoasi bosh murabbiyi Samvel Babayan 6-oktabr kuni Eronga qarshi bo‘lib o‘tadigan o‘yin oldidan matbuot anjumanida ishtirok etdi.
“Ertaga guruh favoritiga qarshi o‘ynaymiz. Eron FIFA reytingiga ko‘ra Osiyoning eng kuchli a’zosi. Tarkibida Yevropada to‘p suradigan futbolchilar bor. Ularni o‘rganib chiqdik, ertaga muxlislarga yoqadigan futbol ko‘rsatishga harakat qilamiz”, — deb gap boshladi Babayan.
“Odil Ahmedov Yevropa Ligasi o‘yinida jarohat oldi. Tiklanish jarayoni yaxshi ketmoqda. Balki uni ertaga maydonda ko‘rarmiz”, — deb futbolchi masalasidagi savolga javob qaytardi murabbiy.
O‘zbekiston milliy terma jamoasi ustozi uni tashvishga eng ko‘p solayotgan jihat ham Odil Ahmedov masalasi ekanini yashirmadi.
Qatarga qarshi o‘yinda Islom To‘xtaxo‘jayev harakat qiladigan O‘zbekistonning o‘ng himoyasida xatolar bo‘lgani haqidagi fikrga Samvel Babayan shunday javob berdi:
“To‘g‘ri, Qatar bilan o‘yinda xatolar kuzatildi. To‘xtaxo‘jayev markaziy himoyasini o‘ngga almashtirgani uchun ham xatolar bo‘lib turadi. Men unga to‘liq ishonishda davom etaman”.
Eron milliy terma jamoasi Toshkentda O‘zbekistonni ikki bor mag‘lub etgan bo‘lib, har ikkisida ham yagona gol so‘nggi daqiqada urilgan. Samvel Babayan jamoasi bunga qanchalik tayyor?
“Raqibni o‘rganish jarayonida forslar bilan avvalgi o‘yinlarni ham ko‘rib chiqdik. Eron hozir ham o‘sha falsafasini o‘zgartirmagan. Ertaga bunga qarshi chora topamiz”, — deb javob berdi Babayan.
Eronga qarshi o‘yinda durang qayd etilsa, bosh murabbiy bunga rozi bo‘larmidi qabilidagi savolga Babayan aniq javob berishni istamadi va savol muallifini oldindan qandaydir tahminlar qilmaslikka chaqirdi.
O‘zbekistonning Eronga qarshi Toshkentadagi hisob bo‘yicha to‘rtinchi o‘yini 6-oktabr kuni 18:00 da — “Bunyodkor” stadionida start oladi.
Izoh (0)