Ўзбекистон миллий терма жамоаси бош мураббийи Самвел Бабаян 6 октябрь куни Эронга қарши бўлиб ўтадиган ўйин олдидан матбуот анжуманида иштирок этди.
«Эртага гуруҳ фаворитига қарши ўйнаймиз. Эрон ФИФА рейтингига кўра Осиёнинг энг кучли аъзоси. Таркибида Европада тўп сурадиган футболчилар бор. Уларни ўрганиб чиқдик, эртага мухлисларга ёқадиган футбол кўрсатишга ҳаракат қиламиз», — деб гап бошлади Бабаян.
«Одил Аҳмедов Европа Лигаси ўйинида жароҳат олди. Тикланиш жараёни яхши кетмоқда. Балки уни эртага майдонда кўрармиз», — деб футболчи масаласидаги саволга жавоб қайтарди мураббий.
Ўзбекистон миллий терма жамоаси устози уни ташвишга энг кўп солаётган жиҳат ҳам Одил Аҳмедов масаласи эканини яширмади.
Қатарга қарши ўйинда Ислом Тўхтахўжаев ҳаракат қиладиган Ўзбекистоннинг ўнг ҳимоясида хатолар бўлгани ҳақидаги фикрга Самвел Бабаян шундай жавоб берди:
«Тўғри, Қатар билан ўйинда хатолар кузатилди. Тўхтахўжаев марказий ҳимоясини ўнгга алмаштиргани учун ҳам хатолар бўлиб туради. Мен унга тўлиқ ишонишда давом этаман».
Эрон миллий терма жамоаси Тошкентда Ўзбекистонни икки бор мағлуб этган бўлиб, ҳар иккисида ҳам ягона гол сўнгги дақиқада урилган. Самвел Бабаян жамоаси бунга қанчалик тайёр?
«Рақибни ўрганиш жараёнида форслар билан аввалги ўйинларни ҳам кўриб чиқдик. Эрон ҳозир ҳам ўша фалсафасини ўзгартирмаган. Эртага бунга қарши чора топамиз», — деб жавоб берди Бабаян.
Эронга қарши ўйинда дуранг қайд этилса, бош мураббий бунга рози бўлармиди қабилидаги саволга Бабаян аниқ жавоб беришни истамади ва савол муаллифини олдиндан қандайдир таҳминлар қилмасликка чақирди.
Ўзбекистоннинг Эронга қарши Тошкентадаги ҳисоб бўйича тўртинчи ўйини 6 октябрь куни 18:00 да — «Бунёдкор» стадионида старт олади.
Изоҳ (0)