Foto: Toshkentdagi yer usti tezyurar metrosi 6 ta bekatdan iborat bo‘ladi
Toshkentning Sergeli tumanida jami uzunligi 8 kilometrdan ziyod bo‘lgan oltita metro bekati quriladi. Bu haqda Toshkent shahar hokimligida bo‘lib o‘tgan matbuot anjumanida Sergeli tumani hokimi Furqat Maqsudxo‘jayev ma’lum qildi.
Bekatlar yo‘l sathidan olti metr balandlikda joylashadi. Ular Sergelining Sputnik dahasidan “Olmazor” metro bekatigacha bo‘lgan oraliqda joylashadi.
“Loyiha ustida ishlar davom etmoqda. Metro, shuningdek, ko‘p qavatli uylar va avtomobil yo‘llari qurishni shu yildayoq boshlash rejalashtirilgan”, — dedi tuman hokimi.
Uning so‘zlariga ko‘ra, bularning barchasi to‘rt yil ichida qurib bitkaziladi.
Eslatib o‘tamiz, O‘zbekiston Prezidenti vazifasini bajaruvchi, O‘zbekiston bosh vaziri Shavkat Mirziyoyev 25-sentabr kuni Toshkent shahrining Sergeli tumanida bo‘lib, aholi vakillari va shahar rahbarlari, mutasaddilar ishtirokida uchrashuv o‘tkazgan va yer usti tezyurar metro qurilishini loyihalashtirishni jadallashtirish vazifalarini belgilab bergan edi.
