Bryusselda O‘zbekiston Respublikasi Prezidenti sayloviga bag‘ishlangan brifing bo‘lib o‘tdi. Tadbirda Belgiya rasmiy muassasalari, Yevropa Ittifoqi tizimlari, tahliliy va tadqiqot markazlari, shuningdek, OAV vakillari ishtirok etdi. Bu haqda “Jahon” axborot agentligi xabar bermoqda.
Uchrashuv davomida ishtirokchilar O‘zbekistonda ushbu muhim siyosiy tadbirga olib borilayotgan keng ko‘lamli tayyorgarlik haqida batafsil ma’lumot berildi. Oxirgi yillarda saylov qonunchiligini takomillashtirish borasida amalga oshirilgan islohotlarga e’tibor qaratildi.
Yevropa parlamenti konsultanti, sobiq deputat Frank Shvalba-Xot O‘zbekiston Respublikasi Prezidenti saylovida turli siyosiy partiyalardan nomzodlar ishtirok etishi mazkur siyosiy jarayon demokratiya va tenglik ruhida o‘tishi nuqtai nazaridan muhim ekanligini ta’kidladi. Zero, saylovchilarga ularning qarashlarini ifodalovchi va manfaatlarini himoya qiluvchi u yoki bu nomzodni tanlash va qo‘llab-quvvatlash imkoniyati taqdim etiladi.
Yevrokomissiya vakili Lukas Maurerning ta’kidlashicha, O‘zbekistondagi eng yuqori davlat lavozimiga barcha siyosiy partiyalardan nomzodlarning ilgari surilishi jamiyatni demokratlashtirish va liberallashtirishga qaratilgan islohotlar mevasidir. Saylovlarga tayyorgarlik va o‘tkazilish jarayonini xorijiy ekspertlar va nufuzli xalqaro tashkilotlar vakillari tomonidan monitoring qilinishi O‘zbekiston qabul qilingan me’yor va standartlarga rioya etayotganidan dalolat beradi.
ASBL Hu-Man jamoatchilik fondi raisi Aureliy Xerkel O‘zbekiston Respublikasi Prezidenti saylovi jamiyatda barqarorlik va birdamlikni mustahkamlash, islohotlarni izchil davom ettirish va mamlakatni modernizatsiya qilish jarayonini davom ettirish uchun o‘ta muhimligini qayd etdi.
Izoh (0)