O‘zbekiston Respublikasi Prezidenti saylovini tashkillash jarayoni xorijiy davlatlar OAVlari tomonidan keng yoritilmoqda. Jumladan, Ozarbayjonning Trend va Report axborot agentliklari veb-saytlarida o‘quvchilarni mazkur mavzu bilan tanishtiruvchi maqolalar joylashtirildi. Bu haqda “Jahon” axborot agentligi xabar bermoqda.
Maqolalarda O‘zbekistonda ro‘yxatdan o‘tgan barcha to‘rt siyosiy partiya prezidentlik saylovlarida ishtirok etishga qo‘yilgani, ularga buni tasdiqlovchi tegishli hujjatlar taqdim etilgani bildirilgan.
Elektron nashrlar Toshkentda Markaziy saylov komissiyasi tomonidan okrug saylov komissiyalari uchun onlayn seminar-trening o‘tkazilganini eslatib o‘tdi. Mazkur seminar-trening saylov qonunchiligi bo‘yicha bilimlarni mustahkamlash, ularni okrug komissiyalarining saylovlarga tayyorgarlik va ularni o‘tkazish jarayonida qo‘llash masalalariga bag‘ishlangani qayd etildi.
Markaziy saylov komissiyasi konstitutsiyaviy organ maqomiga ega ekanligi, davlat hokimiyati tizimida alohida o‘rin egallashi, hokimiyat organlari aralashuvisiz saylovlar tashkillanishi va o‘tkazilishini ta’minlashi ta’kidlandi.
Prezidentlik saylovi oshkora va ochiq tarzda o‘tishi uchun OAV vakillari akkreditatsiyadan o‘tkazilayotgani, xalqaro kuzatuvchilarga taklifnomalar jo‘natilgani xabar qilindi.
Izoh (0)