O‘zbekiston Respublikasi Mehnat vazirligida 3-oktabr, seshanba kuni Jan-Piter Olters boshchiligidagi Jahon banki delegatsiyasi bilan uchrashuv bo‘lib o‘tdi. Bu haqda vazirlik axborot xizmati xabar bermoqda.
Mazkur tashrifdan ko‘zda tutilgan asosiy maqsad Jahon bankining 2016—2020-yillarda O‘zbekiston bilan sheriklik strategiyasi doirasidagi “Ish o‘rinlarini ko‘paytirish va zamonaviy iqtisodiyot talabi asosida malakani yaxshilash” loyihasi mazmuni, qamrab olish miqyosi va konsepsiyasi yuzasidan maslahatlashuvlar o‘tkazishdan iborat bo‘ldi.
Mehnat vaziri Aziz Abduhakimov mehmonlarga O‘zbekistondagi mehnat bozorining bugungi kundagi holati va rivojlanish tendensiyalari, bu borada vazirlik va uning tuzilmalari tomonidan olib borilayotgan ishlar xususida batafsil ma’lumot berdi.
Mamlakatda yangi ish o‘rinlari yaratilishida asosiy turtki berayotgan va aholi bandligini ta’minlashda muhim omil sanaladigan xususiy tadbirkorlik va kichik biznes rivojlanishini rag‘batlantirishning muhim ahamiyati ta’kidlandi. Mazkur yo‘nalish imkoniyatlari va moliyalashtirish manbalarini kengaytirish, bu borada xalqaro moliya institutlari, jumladan, Jahon banki tomonidan kredit liniyalari ochish masalalariga to‘xtalib o‘tildi.
Shuningdek, uchrashuv davomida ishga joylashtirish bo‘yicha xizmatlar hajmini oshirishi va aholi bandligini ta’minlashga qo‘shimcha hissa qo‘shishi mumkin bo‘lgan ishga jalb etish agentliklari faoliyatini rivojlantirish masalalari ko‘rib chiqildi.
Tomonlar asosiy konsepsiya muhokamasini davom ettirish, aniq yo‘nalishlarni belgilab olish, loyiha amalga oshirilishi boshlanishini jadallashtirish imkoniyatini ko‘rib chiqish haqida kelishib oldi.
Izoh (0)