Ўзбекистон Республикаси Меҳнат вазирлигида 3 октябрь, сешанба куни Жан-Питер Олтерс бошчилигидаги Жаҳон банки делегацияси билан учрашув бўлиб ўтди. Бу ҳақда вазирлик ахборот хизмати хабар бермоқда.
Мазкур ташрифдан кўзда тутилган асосий мақсад Жаҳон банкининг 2016—2020 йилларда Ўзбекистон билан шериклик стратегияси доирасидаги «Иш ўринларини кўпайтириш ва замонавий иқтисодиёт талаби асосида малакани яхшилаш» лойиҳаси мазмуни, қамраб олиш миқёси ва концепцияси юзасидан маслаҳатлашувлар ўтказишдан иборат бўлди.
Меҳнат вазири Азиз Абдуҳакимов меҳмонларга Ўзбекистондаги меҳнат бозорининг бугунги кундаги ҳолати ва ривожланиш тенденциялари, бу борада вазирлик ва унинг тузилмалари томонидан олиб борилаётган ишлар хусусида батафсил маълумот берди.
Мамлакатда янги иш ўринлари яратилишида асосий туртки бераётган ва аҳоли бандлигини таъминлашда муҳим омил саналадиган хусусий тадбиркорлик ва кичик бизнес ривожланишини рағбатлантиришнинг муҳим аҳамияти таъкидланди. Мазкур йўналиш имкониятлари ва молиялаштириш манбаларини кенгайтириш, бу борада халқаро молия институтлари, жумладан, Жаҳон банки томонидан кредит линиялари очиш масалаларига тўхталиб ўтилди.
Шунингдек, учрашув давомида ишга жойлаштириш бўйича хизматлар ҳажмини ошириши ва аҳоли бандлигини таъминлашга қўшимча ҳисса қўшиши мумкин бўлган ишга жалб этиш агентликлари фаолиятини ривожлантириш масалалари кўриб чиқилди.
Томонлар асосий концепция муҳокамасини давом эттириш, аниқ йўналишларни белгилаб олиш, лойиҳа амалга оширилиши бошланишини жадаллаштириш имкониятини кўриб чиқиш ҳақида келишиб олди.
Изоҳ (0)