Joriy yilning 12—13-oktabr kunlari Toshkent shahrida XII Xalqaro o‘zbek paxta va to‘qimachilik yarmarkasi bo‘lib o‘tadi. Bu haqda O‘zA xabar bermoqda.
Mazkur xalqaro tadbirni tashkil etishda Xalqaro paxta assotsiatsiyasi, Paxta bo‘yicha xalqaro konsultativ qo‘mita, Cotton Outlook xalqaro agentligi va Xalqaro to‘qimachilik mahsulotlari ishlab chiqaruvchilar federatsiyasi singari xalqaro tashkilotlar O‘zbekiston bilan doimiy hamkorlik qilib kelmoqda.
Bu yilgi yarmarka “O‘zpaxtasanoateksport” xolding kompaniyasi, “O‘zbekyengilsanoat” aksiyadorlik kompaniyasi, O‘zbekiston Respublikasi Tashqi iqtisodiy aloqalar, investitsiyalar va savdo vazirligi, Tovar-xomashyo birjasi, “Sifat” markazi va boshqa tuzilmalar tomonidan o‘tkaziladi.
O‘zbekistonning Birinchi Prezidenti Islom Karimov tashabbusi bilan 2005-yilda ilk marta tashkil etilgan yarmarka dunyo paxta va to‘qimachilik sanoati mutaxassislari, olimlar, yengil sanoatning yirik korxonalari va savdo kompaniyalari vakillari kutadigan nufuzli forumlardan biriga aylandi. Paxta tolasi va to‘qimachilik mahsulotlarini sotish bo‘yicha bozor mexanizmlarini yanada rivojlantirish, O‘zbekiston ishlab chiqaruvchilari hamda ularning xorijlik hamkorlari o‘rtasidagi munosabatlarni mustahkamlashga xizmat qilmoqda.
XII Xalqaro o‘zbek paxta va to‘qimachilik yarmarkasining asosiy tadbirlari “O‘zekspomarkaz” ko‘rgazmalar zalida o‘tkaziladi. Yarmarka doirasidagi konferensiyalar hamda muloqotlarda jahon paxta va to‘qimachilik bozorining yetakchi vakillari tomonidan O‘zbekiston va dunyoda paxta tolasi ishlab chiqarish, savdo va investitsion hamkorlikni kengaytirish kabi ko‘plab masalalar muhokama qilinishi va o‘zaro manfaatli shartnomalar imzolanishi kutilmoqda.
Birinchi yarmarkaga jahonning 30 davlatidan 170 kompaniya va firma vakillari tashrif buyurgan bo‘lsa, bu yil 45 dan ortiq mamlakatning 2 mingga yaqin vakili kelishi kutilmoqda.
Izoh (0)